Iri siganwa ritegurwa n’Ishyirahamwe ry’Umukino w’Amagare mu Rwanda (FERWACY) ndetse n’Umuryango Nyarwanda ushinzwe Kubungabunga Ibinyabuzima byo mu Gasozi (RWCA), ryashyizwemo imihanda ya kaburimbo mu rwego rwo kongerera amasiganwa abakinnyi bitegura shampiyona y’Isi.

Rizatangira gukinwa ku wa Gatanu, tariki ya 22 Kanama 2025, rihere ku byiciro bitandukanye, birimo abagore n’abagabo mu bakiri bato ndetse n’abakuze.

Kuva saa Tanu, abasiganwa bazahaguruka ku Cyicaro cya Gikuru cya RWCA giherereye i Kabuga ahazwi nka Umusambi Village, bakomereze mu Giporoso, bakatire Prince House berekeza Poids Lourds.

Abakinnyi bazazamukira ku Muhima ahazwi nko kuri Yamaha, bamanukire Nyabugogo bakomeza mu Gatsata. Nibaharenga bazakomeza umuhanda wa Karuruma berekeza i Gicumbi muri Miyove mbere yo gusoreza Ibanda.

Abagabo ni bo bazakora uwo muhanda wose ureshya n’ibilometero 104,6; abagore n’ingimbi bo bazakora ibilometero 76 kuko bazahagurukira Karuruma; mu gihe abangavu bo bazakora ibilometero 50.

Ku wa Gatandatu, tariki ya 23 Kanama 2025, hazakinwa amasiganwa yo mu mihanda y’igitaka ‘Gravel Race’. Abazasiganwa mu muhanda w’igitaka bazazenguruka igishanga cya Rugezi, gikikijwe n’imirenge itandatu ya Burera na Gicumbi. Bazahaguruka Butaro berekeze Ibanda ku ntera y’ibilometero 90.

Abakina batarabigize umwuga bakoresha amagare ya Matabaro, bazakoresha bazahaguruka Rwerere basoreze Ibanda muri Miyove. Aba bazaba bakoze intera y’ibilometero 45.

Isiganwa riheruka ryegukanywe na Niyonkuru Samuel mu bagabo, Irakoze Neza Violette mu bagore, Nshutiraguma Kevin mu ngimbi na Iragena Charlotte mu bangavu.

Iri siganwa rizahuzwa n’isabukuru y’imyaka 10 ishize RWCA itangiye kubungabunga imisambi, ikaba yaravuye munsi ya 300 muri ikagera ku 1293 mu 2024.

Isiganwa ry’Umusambi Race rizakinirwa mi mihanda y’igitaka n’isanzwe ya kaburimbo