Ubuyobozi bw’ikipe yo gusiganwa ku magare ya Israel-Premier Tech bwavuze ko ikipe itava mu isiganwa rya La Vuelta, nubwo imyigaragambyo y’abifuza ko ivamo kubera intambara Israel yashoje mu gace ka Gaza.

Ku wa Gatatu, tariki ya 3 Nzeri 2025, ni bwo abakinnyi bitabiriye isiganwa rikomeye rya La Vuelta ribera muri Espagne basabye ubuyobozi bwaryo kumva ubusabe bw’abigaragambya bagakura Israel-Premier Tech mu irushanwa.

Ibi biterwa no kuba iyo abakinnyi bari gusiganwa, abaturage badashyigikiye intambara Israel yateje muri Gaza birunda mu muhanda bikabangamira isiganwa ndetse rimwe na rimwe bigateza n’impanuka.

Ubuyobozi bwa La Vuelta bwavuze ko ikipe itava mu isiganwa kubera iyo mpamvu kuko Ishyirahamwe ry’Imikino yo gusiganwa ku Isi (UCI) ritaratanga uburenganzira bwo kuyikuramo.

Mu itangazo ryashyizwe hanze na Israel-Premier Tech rivuga ko nta gahunda ihari yo kuva mu isiganwa kuko gukina kwayo ari inyungu rusange.

Yagize iti “Israel-Premier Tech ni ikipe y’inyamwuga. Iracyakomeye ku mwanzuro wo guhatana muri La Vuelta kuko ntabwo gusiganwa ari twe gusa bifitiye inyungu, ni ku makipe yose.”

“Twe twubaha umwanzuro wa buri wese n’uburenganzira bwe bwo kwigaragambya, mu gihe byakozwe mu mahoro ntawe bibangamiye. Mureke kwivanga mu bakinnyi bari mu bikundi. Abategura La Vuelta nibakore akazi kabo n’abashinzwe umutekano bakore akabo.”

Iyi kipe ifashwa n’umushoramari Sylvan Adams, igaragaza ko ntaho ihuriye n’intambara ya Israel na Palestine, kuko nta bufasha ihabwa bukomoka ku buyobozi bwa Benjamin Netanyahu.

Kugeza ubu Matthew Riccitello ukinira Israel-Premier Tech ari mu bakinnyi bari kwitwara neza kuko ari ku mwanya wa cyenda ku rutonde rusange.

Israel-Premier Tech yanze kuva mu isiganwa rya La Vuelta

Imyigaragambyo iri gufata indi ntera kubera Israel-Premier Tech iri gusiganwa muri La Vuelta