Ikipe ya Juventus yo mu Butaliyani yakuwe mu makipe azakina Europa Conference League muri uyu mwaka w’imikino nyuma yo kurenga ku mategeko agenga uburyo amakipe akoresha umutungo wayo i Burayi.
Iki cyemezo cyafashwe n’Impuzamashyirahamwe y’Umupira w’Amaguru ku Mugabane w’u Burayi (UEFA), yahannye n’Ikipe ya Chelsea kubera ko "yatanze amakuru atuzuye ku ikoreshwa ry’umutungo wayo."
UEFA yavuze ko ibihano byafashwe hashingiwe ku bikorwa byabaye hagati y’imyaka ya 2012 na 2019. Juventus (…)

Ikipe ya Juventus yo mu Butaliyani yakuwe mu makipe azakina Europa Conference League muri uyu mwaka w’imikino nyuma yo kurenga ku mategeko agenga uburyo amakipe akoresha umutungo wayo i Burayi.

Iki cyemezo cyafashwe n’Impuzamashyirahamwe y’Umupira w’Amaguru ku Mugabane w’u Burayi (UEFA), yahannye n’Ikipe ya Chelsea kubera ko "yatanze amakuru atuzuye ku ikoreshwa ry’umutungo wayo."

UEFA yavuze ko ibihano byafashwe hashingiwe ku bikorwa byabaye hagati y’imyaka ya 2012 na 2019. Juventus yaciwe miliyoni 17.14£, mu gihe Chelsea yaciwe amande ya miliyoni 8.57£.

Iyi kipe yo mu Butaliyani yabwiwe ko izishyura gusa igice cy’amande yaciwe mu gihe ibikorwa bijyanye n’umutungo wayo byo mu myaka itatu ikurikiraho bizaba byubahirije amategeko. Ni mu gihe Chelsea yo yamaze kwemera kwishyura amande yaciwe.

Chelsea yakoresheje agera kuri miliyoni 600£ ku bakinnyi 19 kuva iguzwe na Todd Boehly muri Gicurasi 2022, ariko ibihano yahawe ubu ni ibyo mu myaka irindwi ubwo yari mu maboko ya Roman Abramovich.

UEFA yagize ati "Hagendewe ku igurishwa ry’ikipe muri Gicurasi 2022, abayiguze bashya na raporo zari zahawe UEFA, bigaragara ko raporo y’umutungo mushya yatanzwe n’abari bafite ikipe mbere ituzuye."

Mu gusubiza, Chelsea yavzue ko "yagaragaje ibishoboka ndetse ifasha UEFA" mu iperereza ryayo kandi "yinjiye mu bwumvikane" n’uru rwego ruyobora umupira w’amaguru i Burayi.

Nyuma y’ibihano byatanzwe, Ishyirahamwe ry’Umupira w’Amaguru mu Butaliyani (FIGC) rigomba kumenyesha UEFA ikipe izasimbura Juventus muri Europa Conference League.

Iyo kipe ishobora kuba Fiorentina, yatsindiwe ku mukino wa nyuma w’irushanwa riheruka ubwo yari yahuye na West Ham. Kuri ubu, yasoreje ku mwanya wa munani muri Serie A.

Ibihano Juventus yahawe na UEFA, byakurikiye kandi amande y’ibihumbi 620£ yaherukaga guhabwa n’ubuyobozi bwa ruhago mu Butaliyani, kubera uburyo yagiye yishyura imishahara y’abakinnyi mu manyanga.

Iyi kipe kandi yakuweho amanota 10 muri shampiyona ishize nyuma yo gusanga itaramenyekanishije uko bikwiye amafaranga y’ukuri yagiye igura abakinnyi.

Ku ikubitiro, yari yabanje gukurwaho amanota 15 muri Mutarama, ariko Urukiko Rukuru rwa Siporo mu Butaliyani rukuraho icyo cyemezo muri Mata, rusaba ko cyongera gusuzumwa.

Iyo Juventus idahabwa ibihano byose bimaze kuyigeraho, yari gusoreza ku mwanya wa kane ku buryo yari kubona itike ya UEFA Champions League.