Icyamamare mu mukino wa Basketball, Kevin Durant, yavuye muri Phoenix Suns yerekeza muri Houston Rockets, ku masezerano yaciye agahigo mu mateka ya NBA yahuje amakipe arindwi atandukanye, nk’uko byemejwe n’iyi kipe ya Houston.

Houston Rockets yatangaje kandi ko yagaruye Clint Capela binyuze mu masezerano ya "sign-and-trade" bagiranye na Atlanta Hawks. Aya masezerano akomeye kandi yasize habayeho impinduka hagati y’ amakipe arindwi ariyo Brooklyn Nets, Golden State Warriors, Minnesota Timberwolves, Los Angeles Lakers, Phoenix Suns, Atlanta Hawks, ndetse na Houston Rockets.

Mu butumwa yanyujije kuri X, Durant yasezeye abafana ba Phoenix Suns anagaragaza ibyishimo by’uko agiye gutangira urugendo rushya muri Houston, ikipe ya gatanu agiye gukinira mu NBA.

Yagize ati “Igihe cyanjye muri Phoenix kirarangiye. Ahantu hose nanyuze muri uru rugendo hangiriye umumaro ukomeye. Hari isi inyuma y’ibibera ku kibuga, aho hari abantu bakora uko bashoboye ngo natwe abakinnyi tubeho neza. NBA ni umuryango umwe munini. Urukundo rwinshi kuri Arizona. Houston, sinzabura kuhagera!”.

Kevin Durant uzuzuza imyaka 37 muri Nzeri, yatoranyijwe inshuro 15 mu mikino ya NBA All-Star, akaba ari inshuro 4 ayoboye abandi mu gutsinda amanota menshi. Yatwaye ibikombe bibiri bya NBA ari kumwe na Golden State Warriors mu 2017 na 2018. Yigeze no gutorwa nka MVP wa NBA mu 2014.