Liverpool FC yatsinze Arsenal igitego 1-0 biyihesha kuyobora urutonde rwa Premier League n’amanota icyenda aho imaze gutsinda imikino yayo yose uko ari itatu.

Ni mu mukino w’Umunsi wa Gatatu wa Shampiyona y’u Bwongereza wakiniwe kuri Anfield kuri iki Cyumweru, tariki ya 31 Kanama 2025.

Ni umukino wari utegerejwe cyane ku bafana b’amakipe yombi, dore ko ari yo yari ahanganiye Igikombe cya Shampiyona y’u Bwongereza mu mwaka ushize wa 2024/25.

Ku munota wa gatanu w’umukino, myugariro wa Arsenal Cristhian Mosquera yasimbuye William Salia wagize imvune, impinduka umutoza Mikel Arteta atari yiteze mu minota ya mbere.

Amakipe yombi nta n’imwe yigeze igaragaza kugera imbere y’izamu no kurema uburyo bukomeye bwavamo igitego mu gice cya mbere, usibye ku munota wa 36 ubwo Noni Madueke wa Arsenal yirukankanaga umupira bakamutangira ataratera mu izamu.

Liverpool yitwaye neza mu gice cya kabiri, ibanza gushaka igitego ku munota wa 61, ariko umupira watewe na Florian Wirtz, ukurwamo n’umunyezamu wa Arsenal, David Raya.

Igitego rukumbi cyabonetse muri uyu mukino cyagiyemo ku munota wa 83 gitsinzwe na Dominik Szoboszlai, wateye Coup-franc yari muri metero 32, imanukira mu izamu.

Hagiye gushira imyaka 13 Arsenal itarashobora gukura intsinzi imbere ya Liverpool kuri Anfield.

Ibi byatumye Liverpool ihita ijya ku mwanya wa mbere n’amanota icyenda ku rutonde rwa Shampiyona y’u Bwongereza. Chelsea ni iya kabiri n’amanota arindwi, mu gihe Arsenal ari iya gatatu n’amanota atandatu isangiye na Tottenham, Everton, Sunderland na Bournemouth.

Indi mikino yabaye mu Bwongereza kuri uyu munsi yasize Manchester City itsinzwe na Brighton ibitego 2-1, Nottingham Forest itsindwa na West Ham ibitego 3-0.

Liverpool yikuye imbere ya Arsenal nta nkuru

Dominik Szoboszlai ni we watsinze igitego cya Liverpool

Liverpool yayoboye Shampiyona y’u Bwongereza

Liverpool yabonye igitego mu minota ya nyuma

Arsenal yongeye gutsindwa na Liverpool