Bidasubirwaho, Ikipe ya Manchester City yasinyishije umunyezamu Gianluigi Donnarumma uheruka gutandukana na Paris Saint-Germain, abisikana na Ederson Santana de Moraes werekeje muri Fenerbahçe SK.

Donnaruma yahawe amasezerano y’imyaka itanu nk’uko byemejwe n’iyi kipe yo muri Shampiyona y’Icyiciro cya Mbere mu Bwongereza.

Amafaranga yatanzweho ntiyatangajwe ariko itangazamakuru ryo mu Bwongereza rivuga ko yahawe miliyoni 30 z’Amapawundi mu gihe azambara nimero 99.

Donnarumma yabisikanye na Ederson waguzwe miliyoni 12 z’Amapawundi n’Ikipe ya Fenerbahçe yo muri Turikiya.

Uyu munyezamu w’Umutaliyani yakiniraga Paris Saint-Germain kuva mu 2021, avuye muri Milan AC, ndetse yayifashije kwegukana UEFA Champions League y’uyu mwaka no gukina umukino wa nyuma w’Igikombe cy’Isi cy’Amakipe.

Umutoza Luis Enrique yamukuye mu bakinnyi bari gukina UEFA Super Cup nyuma yo kugura Lucas Chevalier.

Ntibyashimishije Donnarumma wahise atangaza ko azava muri Paris Saint-Germain kuko yababajwe n’icyemezo cyo kumushyira ku ruhande.

Gianluigi Donnarumma w’imyaka 26, yasinye imyaka itanu muri Manchester City

Ederson yerekeje muri Turikiya