Masai Ujiri washinze Zaria Group akanatangiza iserukiramuco rya Giants of Africa rihuza abanyempano muri siporo n’imyidagaduro bo muri Afurika, yashyizwe mu itsinda rifasha Umuryango w’Abibumbye kugera ku ntego z’iterambere rirambye.

Iyi nshingano yayihawe n’Umunyamabanga Mukuru wa Loni, Antonio Guterres, ku wa 28 Kanama 2025 mu gihe habura iminsi mike ngo i New York muri Leta Zunze Ubumwe za Amerika habe Inteko Rusange y’uyu muryango.

Itsinda ry’abafasha Loni kugera ku ntego zirambye risanzwe riyobowe na Minisitiri w’Intebe wa Barbados, Mia Mottley. Abarigize barenga 10 ni abayobozi mu nzego zitandukanye baharanira impinduka ku rwego mpuzamahanga.

Abo ni: Umwamikazi Mathilde w’u Bubiligi, Sheikha Moza bin Nasser wa Qatar, Massimo Bottura washinze sosiyete Food for Soul, Diane von Furstenberg usanzwe ari umuhanzi w’imideli n’umugiraneza na Monica Geingos uyobora umuryango One Economy Foundation na Muniba Mazari uharanira uburenganzira bw’abafite ubumuga no kudaheza.

Iri tsinda kandi ririmo Hindou Ibrahim uharanira kubungabunga ikirere, Graça Machel washinze umuryango Graça Machel Trust, Dia Mirza wamamaza ibikorwa by’ishami rya Loni ryita ku bidukikije, Jeffrey Sachs uyobora ishami riharanira iterambere rirambye muri Kaminuza ya Columbia, Lilly Singh washinze Unicorn Island Fund, Brad Smith wa Microsoft na Hamdi Ulukaya wita ku mpunzi.

Nyuma yo guhabwa iyi nshingano, Masai yagize ati “Siporo ntiyunga abantu gusa, ahubwo isenya inzitizi, ikubaka icyizere, igahindura abantu bose. Kwinjira mu baharanira kugera ku ntego z’iterambere rirambye ni icyubahiro gikomeye kandi nishimiye kuba mu muryango mpuzamahanga ushyigikira urubyiruko, ukageza Isi ku mpinduka zifatika.”

Masai yavukiye mu mujyi wa Bournemouth mu Bwongereza muri Nyakanga 1970, ababyeyi be barimo Umunya-Nigeria n’Umunyakenyakazi bimukira mu gace ka Zaria muri Nigeria ubwo yari afite imyaka ibiri y’amavuko, arahakurira.

Kuva akiri umwana, Masai yiyeguriye Bastketball, ashyigikirwa n’ababyeyi. Yisanze mu makipe akomeye muri uyu mukino i Burayi, nyuma yo gusezera, aba Visi Perezida wa Denver Nuggets muri Amerika, na Perezida wa Toronto Raptors muri Canada.

Mu gihe Masai yayoboraga Toronto Raptors, yakoze ibikorwa byinshi byo gushyigikira Basketball birimo kubaka ibibuga by’uyu mukino mu bihugu bya Afurika birimo u Rwanda, atangira ishoramari ryagutse ahereye ku kubaka Zaria Court Kigali yuzuye muri Nyakanga 2025.

Zaria Group, ibifashijwemo n’ikigo cy’ishoramari cya Helios Investment Partners, iteganya kubaka izindi hoteli byibura enye muri Afurika, zifite ibice byahariwe imikino n’imyidagaduro nk’uko bimeze kuri Zaria Court Kigali.

Uyu mushoramari ahanze amaso imijyi ikomeye kuri uyu mugabane, irimo Johannesburg muri Afurika y’Epfo, Lagos muri Nigeria, Accra muri Ghana na Abidjan muri Côte d’Ivoire.

Masai yashyizwe mu itsinda rifasha Loni kugera ku ntego z’iterambere rirambye