Umunya-Espagne, Margarita Victoria García Cañellas ‘Mavi Garcia’, yabaye umukinnyi wa mbere w’amagare mu bagore wegukanye Etape muri Tour de France y’Abagore afite imyaka 41.

Isiganwa rya Tour de France mu bagore riri mu ntangiriro, ku wa Cyumweru tariki ya 27 Nyakanga 2025, hakinwe agace ka kabiri gaturuka Brest kerekeza Quimper.

Habura ibilometero 10 ngo abakinnyi bagere aho basoreza, Mavi Garcia ukinira ikipe Team Jayco–AlUla yavuye mu gikundi cya bagenzi be ahita ayobora isiganwa abasiga amasegonda 20.

Mu bilometero 110,4 byakinwe kuri uyu munsi, yabikinnye akoresheje amasaha abiri, iminota 44 n’amasegonda 26. Lorena Wiebes wamukurikiye yari amuri inyuma amasegonda atatu.

Uyu mugore ufite imyaka 41, amezi atandatu n’iminsi 25 ni we mukinnyi ukuze uri muri iri rushanwa. Yahise akora amateka yo kuba umukinnyi ukuze wegukanye Etape muri iri siganwa.

Ni agahigo kari gafitwe n’Umuholandi Annemiek van Vleuten wari wegukanye Etape muri Tour de France ya 2022. Icyo gihe yari afite imyaka 39.

Kugeza ubu Tour de France y’abagore iri kuba ku nshuro ya 20, iyobowe n’Umunya-Mauritania Kimberley Le Court Pienaar ukinira AG Insurance–Soudal yo mu Bubiligi.

Agace ka gatatu k’iri siganwa karakinwa kuri uyu wa Mbere tariki ya 28 Nyakanga 2025, mu mihanda ituruka La Gacilly yerekeza Angers ku ntera y’ibilometero 163,5.

Mavi Garcia yegukanye Etape muri Tour de France y’Abagore afite imyaka 41

Mavi Garcia yaciye agahigo muri Tour de France y’Abagore