Nimero ya mbere mu mukino wo gusiganwa ku magare, Umunya-Slovenia Tadej Pogačar, yatangaje ko atazitabira Vuelta a Espana kugira ngo abashe kwitegura neza Shampiyona y’Isi izabera mu Rwanda muri Nzeri 2025.

Mu Cyumweru gishize, Pogačar yegukanye Tour de France ku nshuro ya kabiri yikurikiranya, iba iya kane muri rusange.

Uyu mukinnyi w’imyaka 26 ni we wegukanye Shampiyona y’Isi ya 2024 mu gusiganwa mu muhanda, yabereye i Zürich mu Busuwisi.

Uyu mukinnyi yatangaje ko atazitabira iri siganwa ryo muri Espagne kugira ngo aruhuke neza, bityo bizamufashe kwitegura Shampiyona y’Isi.

Ati “Ndifuza kuzagaruka meze neza by’umwihariko muri Shampiyona y’Isi.”

Vuelta a Espana ni ryo siganwa rukumbi muri atatu akomeye ku Isi Pogačar ataregukana, icyakora yabaye uwa gatatu mu 2019 ari nayo nshuro yaryitabiriye gusa.

Ni ku nshuro ya mbere Shampiyona y’Isi igiye kubera ku Mugabane wa Afurika, aho itegerejwe i Kigali hagati ya tariki 21 na 28 Nzeri 2025.

Tadej Pogačar aheruka kwegukana Tour de France ku nshuro ya kabiri yikurikiranya

Tadej Pogačar amaze kwegukana Tour de France inshuro enye

Pogačar ahanzwe amaso muri Shampiyona y’Isi izabera i Kigali muri Nzeri 2025