Rayon Sports WFC yanyagiye Indahangarwa WFC ibitego 4-0 yegukana Igikombe kiruta ibindi mu Rwanda “FERWAFA Super Coupe cya 2025.

Ni umukino wabereye kuri Stade Amahoro, kuri uyu wa Gatandatu, tariki ya 10 Mutarama 2026.

Rayon Sports WFC na Indahangarwa WFC, ni amwe mu makipe asigaye ahangana cyane muri Shampiyona y’u Rwanda, dore ko yaherukaga guhurira no ku mukino wa nyuma w’Igikombe cy’Amahororo.

Icyo gihe indahangarwa WFC yegukanye igikombe itsinze Rayon Sports ibitego 2-1, ariko Rayon Sports WFC isigara ikubita agatoki ku kandi ishaka na yo kuyishyura.

Iyi kipe yabigezeho iyinyagira ibitego 4-0 byatsinzwe na Emeline Mukagatete, Odette Coralie Ngwena Jeanette Uwikunda na Emerance Niyonshuti.

Kwegukana igikombe byatumye Rayon Sports WFC ihabwa Miliyoni 20 z’amafaranga y’u Rwanda ni mu gihe Indahangarwa yabaye iya kabiri yatahanye Miliyoni 10 Frw.

Biteganyijwe uwo mukino ukirikirwa na Rayon Sports na APR FC na zo zihatanira igikombe cya Super Coup 2025, mu mukino uza gutangira saa kumi n’ebyiri n’igice.