Kapiteni wa AS Kigali WFC, Nibagwire Libellée, yerekeje muri Rayon Sports aho yasinye amasezerano y’umwaka umwe ndetse aba umukinnyi wa gatatu uyerekejemo avuye mu Ikipe y’Umujyi.

Nibagwire ukina mu kibuga hagati, yerekeje muri Gikundiro aguzwe n’abafana y’ikipe nk’uko rimwe na rimwe bigenda mu bagabo. Ntabwo amafaranga yatanzweho yigeze atangazwa.

Muri iri soko ryo muri Mutarama, uyu mukinnyi yabaye uwa gatatu wavuye muri AS Kigali yerekeza muri iyi kipe yambara ubururu n’umweru, nyuma ya Kayitesi Alodie na Uwimbabazi Immaculée bayigezemo mu cyumweru gishize.

Rayon Sports yazamutse mu Cyiciro cya Mbere uyu mwaka ikomeje kugaragaza inyota ikomeye yo kwegukana Igikombe cya Shampiyona n’icy’Amahoro.

Muri rusange, iyi kipe ihanganye na AS Kigali yasoje imikino ibanza ya Shampiyona iri ku mwanya wa mbere kubera ikinyuranyo cy’ibitego kuko amakipe yombi anganya amanota 28.

Shampiyona izasubukurwa mu mpera z’icyumweru gitaha, tariki 6 Mutarama 2024, hatangira imikino yo kwishyura.

IVOMO:IGIHE