Ikipe ya Rayon Sports yahagaritse umutoza wayo Afhamia Lotfi n’umwungiriza we wa Kabiri, Azzouz Lotfi, mu gihe kingana n’ukwezi.

Murera yabitangaje ibinyujije mu itangazo yashyize hanze mu mugoroba wo kuri uyu wa Mbere ku mbuga nkoranyambaga.

Muri iri tangazo yanditse iti: “Ubuyobozi bwa Association Rayon Sports bwafashe icyemezo cyo guhagarika mu nshingano Umutoza mukuru Afhamia Lotfi n’Umutoza wungirije wa kabiri Azzouz Lotfi.”

Rayon Sports yavuze ko Umutoza wungirije wa mbere Haruna Ferouz n’abandi bakorana (Staff technique) barakomeza inshingano zo gutegura imikino iri imbere.

Ibi bije nyuma y’uko Afhamia Lotfi n’uyu mwungiriza we wa kabiri, Azouz Lotfi, bari bagiye mu Nzove gukoresha imyitozo kuri uyu wa Mbere gusa bakavayo batayikoresheje.

Uyu mutoza ahagaritswe nyuma y’uko mu mikino itanu iheruka, Rayon Sports yatsinzemo umwe, ikanganya umwe, igatsindwa itatu.

Yatsinzwe na Singida Black Stars muri CAF Confederation Cup imikino ibiri, itsindwa na Police FC muri shampiyona, inganya na Gasogi United naho itsinda Kiyovu Sports.