Ikipe ya Rayon Sports yatsinze Muhazi United ibitego 2-0, mu mukino usoza iy’Umunsi wa 13 wa Shampiyona wabereye kuri Kigali Pele Stadium.

Mbere y’umukino,Muhazi United yishyuhije iminota itageze kuri 20 nyuma yo gutinda gusohoka mu rwambariro kuko yo n’abasifuzi bageze mu kibuga saa Kumi n’Imwe n’iminota 26.

Rayon Sports yo yari yatangiye kwishyushya guhera saa Kumi n’imwe n’iminota ibiri.

Rayon Sports yayoboye uyu mukino kuva utangiye kugeza urangiye, byayifashije kuwutsinda.

Ku munota wa 27,Bugingo Hakim yahawe umupira ari inyuma y’urubuga rw’amahina, atera ishoti rikomeye ryanyuze ku ruhande rw’izamu rya Muhazi United.

Ku munota wa 33, Rayon Sports yatsinze igitego cya Muhire Kevin kuri Coup Franc yateye ahana ikosa ryakorewe kuri Ojera inyuma gato y’urubuga rw’amahina.

Muhire Kevin yateye uyu mupira unyura mu rukuta, uruhukira mu izamu nyuma yo gukora ku kuboko k’umukinnyi wa Muhazi ukayoba.

Igice cya Mbere cyarangiye ari igitego 1-0.

Rayon Sports yatangiye igice cya Kabiri iri hejuru ndetse ku munota wa 46, Ojera yaguye mu rubuga rw’amahina ashaka gutwara umupira umunyezamu, umusifuzi yanga gutanga penaliti

Ku munota wa 72, Rayon Sports yabonye igitego cya kabiri cyatsinzwe na Musa Essenu n’umutwe,ku mupira mwiza yahawe na Tuyisenge Arsene.

Ku munota wa 76,Joseph Sackey yateye coup franc ikomeyeku ikosa ryakozwe na Rachid Kalisa, umupira ukurwamo na Tamale, ujya muri koruneri.

Ku munota wa 78,Ojera yananiwe gutsinda umupira yahawe na Luvumbu, awukurwaho n’Umunyezamu Ebini, ugarukiye uyu Luvumbu atera ishoti rijya ku ruhande rw’izamu.

Ku munota wa 86,Ojera yananiwe gutsinda igitego cyabazwe, umupira ukurwamo n’Umunyezamu Ebini, ugarukiye Arsene awushota Esenu ku maboko, umusifuzi agaragaza ko habayeho ikosa.

Rayon Sports yatsinze Muhazi United ibitego 2-0, igira amanota 26 ku mwanya wa kabiri, irushwa inota rimwe na APR FC ya mbere nyuma y’imikino 13 imaze gukinwa.

Muhazi United igumye ku mwanya wa 11 n’amanota 14.

Mu yindi mikino yabaye kuri uyu wa Gatatu, Mukura VS yatsinze Kiyovu Sports ibitego 4-1 naho Etincellles FC itsinda AS Kigali ibitego 4-2.