Impuzamashyirahamwe y’Umupira w’Amaguru muri Afurika (CAF), yahaye ibihano Perezida w’Ishyirahamwe rya Ruhago muri Cameroun (FECAFOOT), Samuel Eto’o, byo guhagarikwa imikino ine akanishyura ibihumbi 20$ kubera imyitwarire mibi.

Mu ijoro ryo ku wa Gatatu, tariki ya 14 Mutarama 2026, ni bwo FECAFOOT yashyize hanze itangazo rigaragaza imyanzuro y’ibyavuye mu kanama gashinzwe imyitwarire muri CAF.

Ni umwanzuro w’ibyagaragaye mu mukino Cameroun yahuriyemo na Maroc tariki ya 9 Mutarama muri ¼ cy’Igikombe cya Afurika, wabereye kuri Prince Moulay Abdellah Stadium iri mu Mujyi wa Rabat.

Icyo gihe hagaragaye amashusho ya Samuel Eto’o ari gukankamira Perezida wa CAF, Patrice Motsepe, na Perezida w’Ishyirahamwe rya Ruhago muri Maroc (FRMF), Fouzi Lekjaa.

Icyo gihe yarimo abaza aba bagabo bombi impamvu imisifurire itari kugenda neza, ahubwo igahengamira ku ruhande rwa Maroc, abandi mu bari bakurikiye umukino bari mu myanya y’icyubahiro ni bo begereye uyu mugabo bamusaba gutuza.

Akanama gashinzwe imyitwarire muri CAF, karateranye kiga kuri iki kibazo, gasanga Samuel Eto’o akwiriye guhagarikwa imikino ine atagaragara ku kibuga mu marushanwa ategurwa na CAF, akanishyura ibihumbi 20$ [miliyoni 29,1 Frw].

Si ubwa mbere Samuel Eto’o ahawe ibihano nk’ibi kuko yabihawe mu Ukwakira 2024 ubwo yasagariraga abasifuzi mu Gikombe cy’Isi cy’Abagore. Icyo gihe yahanwe na FIFA.

Igikombe cya Afurika kigeze aho rukomeye, dore ko Maroc na Sénégal zigomba guhurira ku mukino wa nyuma uteganyijwe ku Cyumweru, tariki ya 17 Mutarama 2026.

Samuel Eto’o yongeye guhabwa ibihano na CAF kubera imyitwarire mibi