Komite Nyobozi ya Rayon Sports ihagarariwe na Twagirayezu Thaddée yasubije ibaruwa yari yandikiwe n’Urwego rw’Ikirenga rwayo ruyobowe na Muvunyi Paul, igaragaza imbogamizi mu kwitabira Inteko Rusange Isanzwe rwari rwatumije.

Buri mwaka, akenshi mbere y’uko umwaka mushya w’imikino utangira, amakipe menshi arimo Rayon Sports ategura inteko rusange isanzwe iba igiye gusuzumirwamo ibyaranze umwaka wabanje, ikanemerezwamo ibikorwa n’ingengo y’imari by’umwaka mushya.

Ku wa 29 Nyakanga ni bwo Komite Nyobozi ya Rayon Sports n’izindi nzego zatowe, zandikiwe zisabwa gutegura inyandiko zizakoreshwa mu nama y’Inteko Rusange Isanzwe y’Umuryango iteganyijwe kuba ku wa 24 Kanama 2025.

Muri izi nyandiko, Komite Nyobozi yagombaga kugaragaza raporo y’ibikorwa n’iy’umutungo by’umwaka wa 2024-2025, gahunda y’ibikorwa n’ingengo y’imali by’umwaka wa 2025-2026, raporo y’ubugenzuzi ya 2024-2025 na raporo ya komite ishinzwe gukemura amakimbirane ya 2024-2025.

Iyi baruwa yasinyweho na Muvunyi Paul nka Perezida na Murenzi Abdallah nk’Umunyamabanga b’Inama y’Ubutegetsi, yategetse ko ibi biba byatanzwe bitarenze tariki ya 17 Kanama 2025.

Mu gusubiza iyi baruwa ku wa 30 Nyakanga, Perezida wa Rayon Sports, Twagirayezu Thaddée, yagaragaje impamvu zishobora kubangamira ishyirwa mu bikorwa ry’iyo nama, ziganjemo imyiteguro y’umwaka mushya wa 2025/26.

Mu byagaragajwe harimo ko kuva ku ya 1 kugeza ku ya 15 Kanama 2025, hari ibikorwa bikomeye bya Rayon Week na Rayon Day, irimo n’umukino wa gicuti mpuzamahanga uzahuza Rayon Sports na Yanga SC yo muri Tanzania.

Yavuze ko uyu mukino wigijwe imbere kubera icyifuzo cy’umufatanyabikorwa wayo ari we SKOL, kuko ari umuyoboro w’ingenzi uzafasha mu kubona inkunga izakoreshwa mu kwitegura imikino ya CAF Confederation Cup.

Rayon Sports ifite imikino ya gicuti mpuzamahanga izayihuza na AZAM FC yo muri Tanzania na Vipers SC yo muri Uganda. Ni imikino iteganyijwe hagati ya tariki ya 19 na 26 Kanama 2025, ikazasaba imyiteguro yihariye ndetse no kwakira neza aba bashyitsi.

Ikindi Twagirayezu Thaddée yagarutseho ni impamvu yo kuvugurura amategeko nk’uko Komite yabisabwe n’Urwego rw’Igihugu rw’Imiyoborere (RGB), ndetse n’Inteko Rusange isanzwe yari iteganyijwe ikimurwa.

Ati “Dushingiye ku ibaruwa ya RGB yo ku wa 19 Kamena 2025, yasabye ko hategurwa amavugurura y’amategeko shingiro ya ‘Rayon Sports Association’. Ibi bisaba ibiganiro rusange n’abanyamuryango mbere y’uko bigezwa mu Nteko Rusange. Igihe gito dusigaranye nticyatwemerera gutegura ibi biganiro neza ngo habeho n’ubwitabire bunoze.”

“Ku bw’izo mpamvu, turasaba ko Inteko Rusange isanzwe yari iteganyijwe ku wa 24 Kanama 2025 yimurirwa mu kwezi kwa Nzeri 2025, ku matariki twakumvikanaho kugira ngo habeho umwanya uhagije wo gutegura inyandiko zose z’ingenzi; kuganira n’abanyamuryango ku mavugurura akenewe; gutegura no kwakira inama mu buryo butunganye kandi bufite ireme.”

Amakuru IGIHE yamenye ni uko Inama y’Ubutegetsi ya Rayon Sports (Urwego rw’Ikirenga) yatangiye guteguza iyi nama muri Gicurasi, ikaba yari kuba ku wa 29 Kamena 2025.

Gusa Komite Nyobozi yavuze ko iri mu rugamba rwo guhatanira Igikombe cya Shampiyona, bityo bigoye gutegura raporo zasabwe.

Twagirayezu Thaddée yasubije ubusabe bw’Inama y’Ubutegetsi iyobowe na Muvunyi Paul, avuga ko inama yakwimurirwa muri Nzeri ku matariki yakumvikanwaho