Icyambere ni ukumenya ko u Rwanda ruzwiho kwakira neza abashyitsi. Ibi nibyo igihugu cyiyemeje kugaragaza mu buryo budasanzwe ubwo ruzaba rwakira irushanwa rikomeye ku rwego rw’Isi rya UCI Road World Championships rizabera i Kigali kuva ku ya 21 kugeza ku ya 28 Nzeri 2025. Ni amateka mashya.

Iri rushanwa rizaba amahirwe yo kugaragaza umuco nyarwanda, uburanga bw’igihugu n’ubutwari bw’abaturage barwo imbere y’Isi yose. Abanyarwanda bose basabwa kurangwa n’imico y’ubugwaneza n’ubusabane kugira ngo icyubahiro igihugu kimaze kugira nk’igihugu cyakira neza abashyitsi kirusheho kugaragara.

Mu cyumweru cyose, Kigali izaba umutima w’amagare ku rwego mpuzamahanga, yakire ibihumbi by’abakinnyi, abafana n’abakerarugendo baturutse hirya no hino ku Isi. Ntibizaba gusa urugamba rw’abakinnyi ku makipe n’umwambaro w’icyubahiro uzwi nka Rainbow Jersey, ahubwo bizaba n’amahirwe y’ingenzi ku Rwanda yo kugaragaza ubushobozi rufite mu kwakira ibikorwa bikomeye, imiterere yacyo n’umuco warwo uhebuje.

U Rwanda rufite izina nk’igihugu cyiza mu mutekano no kwakira neza abashyitsi muri Afurika, bikarutera kuba ahantu heza ho kwakirira irushanwa nk’iri. Ibi ntabwo byagezweho ku bw’impanuka, ahubwo ni gahunda yateguwe neza. UCI World Championships ni kimwe mu bice bigize iyo gahunda y’igihe kirekire.

Nk’uko ubushakashatsi bwa Usebounce bwo mu 2022 bugaragaza, u Rwanda ni rwo gihugu cya mbere mu mutekano muri Afurika ku bakora ingendo bonyine ndetse rukaba urwa gatandatu ku Isi. Iki cyizere gifite ishingiro: Kigali izwiho isuku, umutekano n’urugwiro rw’abaturage bayo. Ntibitangaje rero ko abashyitsi bazagira ibihe byiza by’akataraboneka mu gihe bazamara mu Rwanda.

Abashyitsi babarirwa mu bihumbi bitezwe mu gihe cy’iri rushanwa, kandi bizaba ngombwa ko buri Munyarwanda ashyira mu bikorwa inshingano yo kuba umuyobozi cyangwa umufasha igihe cyose yabona umushyitsi ukeneye ubufasha. Ibi si ukwiyerekana, ahubwo ni ibisanzwe mu muco nyarwanda.

Gusa inshingano si ukubakira neza gusa no gutanga umutekano. Igihugu kigomba kubyaza umusaruro iyi nyenyeri ya Shampiyona y’Isi y’Amagare kugira ngo kizagire ishusho izaramba nyuma y’icyumweru cy’imyidagaduro y’amagare. Ni amahirwe adasanzwe yo kugaragaza icyo Abanyarwanda bashoboboye, abo bari bo koko n’ibyo baahagarariye.

U Rwanda ni rumwe kandi rufite isura imwe: igihugu cyubaka icyizere ku rwego mpuzamahanga nk’umufatanyabikorwa wizewe mu bikorwa by’imikino.

Igisata cy’ubukerarugendo bwakira abantu kigomba kuba cyiteguye kwakira abashyitsi bafite ibisabwa bitandukanye, batanga serivisi zihuye n’aho Isi igeze n’ibidasanzwe bigaragaza umwihariko w’u Rwanda. Ni ngombwa kandi no kugaragaza umuco nyarwanda unogeye ijisho: imbyino za kinyarwanda, umuziki gakondo, ubugeni n’ubukorikori bigomba guhabwa umwanya muri ibi birori kugira ngo abashyitsi bazasubirane iwabo ishusho nyayo y’u Rwanda.

Ni ngombwa kandi ko amahoteli, resitora n’ahandi hantu ho gucumbikira abantu haba ku rwego rwo hejuru, kuko u Rwanda rutari rwarigeze kwakira irushanwa rikomeye nk’iri. Ubufatanye n’abikorera buzaba ingenzi mu guhuza ubukerarugendo bwo ku rwego mpuzamahanga n’umuco nyarwanda.

Imihanda y’u Rwanda, izwiho kuba iri ku rwego rwiza kandi yitaweho, ni imwe mu mpamvu zatumye Kigali ihabwa kwakira iri rushanwa. Ariko kandi, bitewe n’ubwinshi bw’abashyitsi, igihugu kigomba gutegura uburyo bwose bwo gutwara abantu neza: imodoka rusange, imodoka zitwara abantu benshi, ndetse n’ama-taxi.

Ntitwakwirengagiza ko moto ari kimwe mu bimenyetso byihariye bya Kigali. Aba bamotari bazaba isura y’umujyi imbere y’Isi yose, bityo bikaba ari ngombwa ko nabo bahabwa agaciro bakwiye mu myiteguro y’iri rushanwa.

U Rwanda rufite inyungu ikomeye mu kuba igihugu gito: ibintu byose by’ingenzi biboneka hafi, kuva mu mujyi wa Kigali kugera ku masangano y’ibirunga muri Musanze. Ikindi kandi, igihugu gifite indangagaciro z’ubukerarugendo burambye. Abashyitsi bagomba gusubira iwabo bigishijwe uburyo u Rwanda rwita ku bidukikije.

Gukoresha imodoka zikoresha amashanyarazi, kugabanya imyanda ya pulasitike no gushyiraho gahunda yo gusubiramo imyanda bishobora gufasha u Rwanda guhuza iri rushanwa n’indangagaciro zarwo zo kurengera ibidukikije.

Kudategura neza byaba igihombo gikomeye ku isura y’igihugu nk’ahantu nyaburanga no ku mahirwe y’ahazaza mu kwakira imikino mpuzamahanga. UCI Road World Championships ntabwo ari amarushanwa gusa, ahubwo ni amahirwe yo gushyira u Rwanda ku rwego rwo hejuru mu bukerarugendo bw’imikino.

Irushanwa riramutse riteguwe neza, ryazamura u Rwanda ku rwego rumwe na Afurika y’Epfo cyangwa Maroc mu bijyanye no kwakira imikino mpuzamahanga. Iyi nyenyeri izazanwa n’iri rushanwa ni isoko y’iterambere: kongera akazi, guteza imbere ubukungu no kongera imishinga y’inyongera mu bikorwaremezo.

Isi yose izaba ireba u Rwanda. Ni ngombwa ko abaturage bagira umwete, bagategura buri kantu neza; uburyo bwo kwakira abantu, ibikorwaremezo, umuco n’imyitwarire. Bagomba kwerekana ko badashoboye gusa kwakira amarushanwa, ahubwo bashoboye gutanga ubunararibonye budasanzwe.

U Rwanda ruzaba ruhetse Afurika yose ku bitugu, kandi ntabwo Kigali izumva icyanga cyo guhabwa amahirwe akomeye nk’aya. Amahirwe ari imbere y’Abanyarwanda; kuyapfusha ubusa si amahitamo.

U Rwanda rwiteguye kubyaza umusaruro amahirwe yo kwakira Shampiyona y’Isi y’Amagare

Inzego zose ziteguye guhesha Igihugu ishema no kukizamura mu bijyanye n’ubukungu binyuze muri iri rushanwa