Harabura iminsi 11 Ikipe y’Igihugu y’u Rwanda igakina imikino ibiri ikomeye mu yo gushaka itike yo kujya mu Gikombe cy’Isi cya 2026.

Sponsored Ad

Imvaho Nshya igiye kubagezaho uko bamwe mu bakinnyi b’Abanyarwanda bakina hanze y’Igihugu bitwaye mu mpera z’icyumweru gishize, baba abakina muri Afurika cyangwa hanze yayo mbere y’uko umutoza mushya w’Amavubi, Adel Amrouche ahamagara abo azifashisha.

Al Ahly Tripoli yo mu cyiciro cya mbere muri Libya ikinamo Kapiteni w’ikipe y’igihugu ‘’Amavubi’’ Djihad Bizimana na myugario Manzi Thierry yanganyije na Al Dahra igitego 1-1 mu mukino w’umunsi wa 15 wa shampiyona, ikomeza kuyobora itsinda rya kane n’amanota 33.

Muri uyu mukino bombi bakinnye iminoita yose y’umukino.

Impera z’icyumweru zari nziza kuri myugariro Mutsinzi Ange ukinira FK Zira yo mu cyikiro cya mbere muri Azerbaijan aho yafashije ikipe ye gutsinda Sebail ikinamo Rutahizamu w’ikipe y’igihugu “Amavubi” Nshuti Innocent igitego 1-0 mu mukino w’umunsi wa 26 wa shampiyona, ifata umwanya wa kabiri n’amanota 51.

Muri uyu mukino Mutsinzi Ange yakinnye iminota yose mu gihe Nshuti Innocent yasimbuwe ku munota wa 67.

Mu Bubiligi Hakim Sahabo yakinnye iminota yose y’umukino ikipe ye ya K. Beerschot V.A y’abakinnyi 10 yatsinzwemo na St Truidense ibitego 2-0 mu mukino w’umunsi wa 29 wa Shampiyona y’icyiciro cya mbere mu Bubiligi, ikomeza kuba ku mwanya wa nyuma n’amanota 18.

Mu gihugu cya Tunisia, Stade Tunisien yo mu cyiciro cya mbere ikinamo Mugisha Bonheur yatsinze EGS Gafsa ibitego 2-1 mu mukino w’Umunsi wa 24 wa Shampiyona, ikomeza kuguma ku mwanya wa Gatandatu n’amanota 43.

Uyu munyarwanda ukina hagati yugarira yakinnye iminota yose y’umukino.

Ishimwe Anicet ukinira Olympique de Béja yo mu cyiciro muri Tunisia yinjiye mu kibuga asimbuye ku munota wa 65 mu mukino ikipe ye yatsinzwemo na US Monastir igitego 1-0.

Rutahizamu Gitego Arthur uherutse kwerekeza muri Clube Ferroviário da Beira yo mu cyiciro cya mbere muri Mozambique avuye muri AFC Leopards yatsinze igitego muri bitatu ikipe ye yatsinzemo Estrela Vermelha.

Umunyezamu w’Amavubi, Ntwari Fiacre, akomeje kurwana no kubona umwanya wo gukina muri Kaizer Chiefs yo muri Afurika y’Epfo, kuko bisigaye bigorana, mu mpera z’icyumweru ntiyari ku ntebe y’abasimbura mu mukino ikipe ye yatsinzemo Stellenbosch ibitego 3-1 mu mukino ubanza wa ¼ cy’igikombe cy’ishyirahamwe ry’umupira w’amaguru muri icyo gihugu.

Phanuel Kavita wa Birmingham yo mu cyiciro cya Kabiri muri Leta Zunze Ubumwe za Amerika yatangiye nabi shampiyona batsindwa na Loudoun United ibitego 3-1 mu mukino uyu Munyarwanda yakinnyemo iminota yose.

Muri Shampiyona y’icyiciro cya kabiri mu Bubiligi, RAAL La Louvière ikinamo Samuel Gueulette, yakinnye iminota yose y’umukino banganya na Club Liege igitego 1-1 mu mukino w’umunsi wa 25 wa shampiyona, ikomeza kuba ku mwanya wa gatatu n’amanota 47.

Kwizera Jojea wa Rhode Island yo mu cyiciro cya kabiri muri Leta Zunze Ubumwe za Amerika, we na bagenzi be bakomeje imyitoza bitegura umukino wa mbere wa shampiyona Charleston Battery ku wa 16 Werurwe 2025.

Myugariro Imanishimwe Emmanuel ’Mangwende’ we aracyakomeje kugira imvune ituma atagaragara mu mikino y’ikipe ye ya AEL Limassol ikina muri Shampiyona yo muri Cyprus.

Abakinnyi bose bakina hanze bafite akazi katoroshye ko kurushaho kwitwara neza kugira ngo barusheho kureshya Umutoza Amrouche uri hafi guhamagara abo azifashisha mu mikino ibiri irimo uwa Nigeria tariki ya 21 n’uwa Lesotho tariki ya 25 Werurwe 2025 kuri Stade Amahoro.