Umunya-Tunisia Yamen Zelfani ’Alfani’ nk’Umutoza uheruka kwakirwa mu ikipe ya Rayon Sports nk’umutoza mukuru yatangiye ku gaya imikinire y’abamyugariro na barutahizamu bayo asaba kuzana abashya.
Yamen Zelfani nyuma y’imyitozo itatu akoresheje bivugwa ko hari abakinnyi yamaze kubona ko batari ku rwego yifuza bityo ko bakwiye kumushakira abandi.
Bivugwa ko bamwe mu bakinnyi yanenze urwego barimo kapiteni w’iyi kipe, Rwatubyaye Abdul ndetse n’umunyezamu Simon Tamale.
Zelfani yemereye (…)

Umunya-Tunisia Yamen Zelfani ’Alfani’ nk’Umutoza uheruka kwakirwa mu ikipe ya Rayon Sports nk’umutoza mukuru yatangiye ku gaya imikinire y’abamyugariro na barutahizamu bayo asaba kuzana abashya.

Yamen Zelfani nyuma y’imyitozo itatu akoresheje bivugwa ko hari abakinnyi yamaze kubona ko batari ku rwego yifuza bityo ko bakwiye kumushakira abandi.

Bivugwa ko bamwe mu bakinnyi yanenze urwego barimo kapiteni w’iyi kipe, Rwatubyaye Abdul ndetse n’umunyezamu Simon Tamale.

Zelfani yemereye itangazamakuru ko yamaze kubwira ubuyobozi bw’iyi kipe ko yifuza undi myugariro mwiza ufite ubunararibonye ku mikino mpuzamahanga.

Ati “Nasabye myugariro kubera ko tuzakina Imikino Nyafurika, ni imikino isaba abakinnyi bafite ubunararibonye, abakinnyi bafata ibyemezo kuko dushobora kuzakina n’ikipe nini, kongeramo amaraso mashya mu ikipe ni byiza, Rayon Sports ni ikipe nini, uba ugomba kongeramo imbaraga kubera umwaka w’imikino nimuremure.”

Yakomeje kandi avuga ko yamaze no gusaba undi rutahizamu uri ku rwego rwiza ugomba kuza gufatanya n’abandi bahari kuko imikino bazakina ari imikino ikomeye cyane yo ku rwego rwo hejuru.

Kugeza ubu Rayon Sports yamaze gusinyisha abagande babiri, umunyezamu Simon Tamale na rutahizamu Charles Baale, umurundi Aruna Moussa Madjaliwa, umukongomani Jonathan Ifunga Ifasso, umunya-Maroc, Youssef Rharb ndetse n’abanyarwanda 3; Serumogo Ali, Nsabimana Aimable na Bugingo Hakim.

Uyu mugabo w’imyaka 43 yanyuze mu makipe arimo FC Nouadhibou yo muri Mauritania, Al-Merrikh yo muri Sudani, Dhofar yo muri Oman, JS Kabylie yo muri Algeria, AS Soliman yo muri Tunisia, Al-Kawkab yo muri Arabie Saoudite, Al-Talaba yo muri Iraq na Jeddah aherukamo muri Arabie Saoudite.

Umunyamabanga Mukuru wa Rayon Sports, Namenye Patrick, yabwiye itangazamakuru ry’iyi kipe impamvu yatumye bahitamo uyu mutoza.

Yagize ati “Kuko twifuza kwitwara neza ku ruhando rwa Afurika tukanegukana Igikombe cya Shampiyona uyu mwaka w’imikino tugiye gutangira, twatoranyije umutoza ufite ibigwi kandi umenyereye amakipe akomeye. Nyuma yo gutangaza umutoza turakurikizaho gutangaza abo bazakorana.”

Byitezwe ko uyu mutoza azagera mu Rwanda mu mpera z’iki cyumweru agategura imyitozo y’imikino ibiri ya gicuti izabanziriza Umunsi w’Igikundiro uteganyijwe ku wa 5 Kanama 2023, irimo ushobora kuyihuza na Vital’O FC y’i Burundi na Mukura VS y’i Huye.