Nubwo hari hamaze iminsi havugwa urutonde rurerure rw’abatoza bashobora gusimbura Zinedine Zidane muri Real Madrid,guhera muri iri joro ibinyamakuru bitandukanye byemeje ko Carlo Ancelotti ariwe uri kuganira cyane na Real Madrid ku buryo ashobora kuyerekezamo.

Uyu mugabo uri gutoza Everton muri iki gihe,abaye umutoza wa 3 w’Umutaliyani uvugwa muri Real Madrid nyuma ya Massimiliano Allegri werekeje muri Juventus na Antonio Conte udafite akazi.

Abandi bavuzwe ni umutoza wa Paris Saint-Germain,Mauricio Pochettino,umutoza wa Castilla,Raul Gonzalez Blanco n’umutoza wa Real Sociedad B,Xabi Alonso.

Nkuko byatangajwe mu kiganiro El Larguero cya Radio Cadena SER, Ancelotti niwe wifuzwa cyane na Florentino Perez ndetse ngo ibiganiro bigeze kure.

Uyu mugabo wakoze ibigwi muri AC Milan yatoje ku kibuga cya Estadio Santiago Bernabeu hagati ya 2013 na 2015, atwara Champions League i Lisbon muri 2014.

Yatwaye kandi na Copa del Rey, Supercopa de Espana na Club World Cup muri iyi kipe.

Uyu mutoza ukomeye yasinye amasezerano y’imyaka 3 muri Everton ikina muri Premier League aho akorana n’umukinnyi wahoze muri Real Madrid,James Rodriguez.

Umunyamakuru uzwi cyane mu gutangaza ibijyanye no kugura no kugurisha abakinnyi,Fabrizio Romano,yatangaje ko ibiganiro bigeze kure hagati ya Ancelotti na Real Madrid ndetse ngo uyu mutoza arifuza gusubira muri iyi kipe y’igihangange.

Carlo Ancelotti ashobora kugaruka muri Real Madrid