Abahanzi Bruce Melodie, Element Eleéeh, Burna Boy, na Davido bari mu batangajwe ku rutonde rw’abahataniye ibihembo bya AFRIMA 2025 (All Africa Music Awards) bizabera i Lagos muri Nigeria kuva tariki 25 kugeza 30 Ugushyingo 2025.

Bruce Melodie an Element bahagarariye u Rwanda mu cyiciro cy’umuhanzi mwiza w’umwaka muri Afurika y’i Burasirazuba (Best Male/Female Artist in East Africa). Bruce Melodie ahatanye binyuze mu ndirimbo “Beauty on Fire” yakoranye na Joeboy. Ni mu gihe Element Eleéeh we yahatanye abicyesha indirimbo ye “Tombe”.

Muri iki cyiciro bahuriyemo n’ibyamamare birimo Diamond Platnumz, Bien, Joshua Baraka, Juma Jux, Marioo, Mbosso, Sat-B ndetse na Yared Negu.

Ku rwego rusange rw’ibi bihembo, ibyamamare bikomeye nka Burna Boy, Davido, El Grande Toto, Rema na Fally Ipupa nabyo biri mu bahataniye ibihembo bikomeye birimo: Album of the Year (Album y’umwaka), Song of the Year (Indirimbo y’umwaka) na Best Collaboration (Indirimbo ihuriweho).

Burna Boy na Davido bahagarariye Nigeria nibo bayoboye n’indi myanya myinshi kuko buri umwe ahatanye mu byiciro bitanu, kimwe na DJ Maphorisa wo muri Afurika y’Epfo ndetse na El Grande Toto wo muri Maroc.

Abandi bahanzi bafite amahirwe menshi ni Shallipopi (Nigeria), Mia Guissé (Senegal), Moliy (Ghana), Amr Diab (Misiri), Tyla (Afurika y’Epfo), Uncle Waffles (Eswatini) n’abandi.

Ntihasigaye kandi izina rikomeye rya Aya Nakamura, DJ Snake, Darkoo, Faouzia, WizTheMC n’abandi bahagarariye Diaspora.

Gutora bizatangira ku wa 10 Nzeri 2025 binyuze kuri website ya AFRIMA, bikazasozwa ku wa 30 Ugushyingo 2025, umunsi ubanza ku muhango nyir’izina wo gutanga ibi bihembo.

Umwe mu bagize akanama ka AFRIMA, Delani Makhalima, yavuze ko uru rutonde rw’abahatanye muri 2025 ari ikimenyetso cy’uko umuziki wa Afurika ukomeje kuba igihangange ku rwego mpuzamahanga.

Ati: “Mu myaka 12 gusa, twavuye aho twabaga dusuzuguritse tukaba ubu turi imbaraga zikomeye ku isi. AFRIMA ni bwo butumwa bukomeye bwa muzika ya Afurika.”

Ibi bihembo bitegurwa ku bufatanye na African Union Commission, Leta ya Nigeria ndetse na Lagos State nk’umujyi uzabyakira.

Muri iki cyumweru cyose kizabera Lagos, hazabamo ibirori bitandukanye birimo: AFRIMA Music Village, Africa Music Business Summit, Nominees Party, byose bigasozwa n’umuhango nyirizina ku wa 30 Ugushyingo 2025, uzanyura kuri televiziyo mu bihugu birenga 84 byo ku isi.

Ibihembo bya AFRIMA 2025 byanditse amateka mashya, aho byakiriye ubusabe 10,717 bw’abahanzi bifuza guhatanira ibihembo bitandukanye. Ni umubare munini kurusha indi yose yabonetse kuva ibi bihembo byatangira mu myaka 12 ishize.

Nyuma y’iminsi 10 y’isesengura ryakozwe n’akanama k’abacamanza mpuzamahanga bagizwe n’abantu 13, hatanzwe urutonde rugizwe n’abahatana 343 mu byiciro 40. Abo bahanzi bahagarariye uturere dutanu twa Afurika ndetse na Diaspora.

Gutora bizatangira ku wa 10 Nzeri 2025 ku isi hose binyuze ku rubuga rwa AFRIMA, bigasozwa ku wa 30 Ugushyingo 2025, umunsi ubanza ku muhango wo gutanga ibi bihembo.

Uretse akanama k’abacamanza 13, akana gatora kagizwe kandi n’itsinda ry’abantu 100 (College of Voters) barimo inzobere mu muziki wa Afurika, abashakashatsi, abavuga rikijyana mu buhanzi, aba Dj ndetse n’abakunzi ba muzika bazwi, bose bagatanga amajwi bagendeye ku: Ubwiza n’ubuhanga mu gutunganya indirimbo, Umwimerere n’ubuhanzi, n’Ubuziranenge bw’ibihangano.

Ibi byose bikorwa hanyuze kuri internet gusa ku rubuga www.afrima.org. Hari ibyiciro bibiri byihariye bitangwa n’akanama mpuzamahanga ka AFRIMA hamwe na ’College of Voters’ birimo: AFRIMA Legend Award, ndetse na Producer of the Year.

Nyuma yo gusoza itora, abagenzuzi mpuzamahanga ba AFRIMA ni bo bakusanya amajwi, bakayashyikiriza abategura ibirori mu ibanga rikomeye ku munsi nyirizina w’umuhango.

Umuhanzi cyangwa indirimbo ibonye amajwi menshi kurusha abandi mu cyiciro runaka niyo yegukana igihembo cya AFRIMA. Uburyo bwose bw’itora bwubahiriza ubunyangamugayo, ku buryo nta muntu ku giti cye cyangwa itsinda ribasha kumenya amajwi y’abandi.

Bruce Melodie ahataniye igikombe muri AFRIMA 2025 binyuze mu ndirimbo ‘Beauty on Fire’ yakoranye na Joeboy

Producer Element Eleéeh ufite izina rikomeye mu muziki nyarwanda, yahatanye muri AFRIMA 2025 n’indirimbo ye Tombe

Umuhanzi w’icyamamare Davido wo muri Nigeria, uri mu bayoboye AFRIMA 2025 n’amanota menshi mu byiciro birimo Album y’umwaka n’indirimbo y’Umwaka

Burna Boy, umwe mu bahanzi ba Nigeria bari ku isonga muri Afurika, ahatanye mu byiciro bitanu muri AFRIMA 2025

Umwami wa Bongo Flava, Diamond Platnumz, ari mu bahanzi bahagarariye Afurika y’i Burasirazuba muri AFRIMA 2025