skol
Kigali

R. Kelly yahamwe n’icyaha mu rubanza rwo gucuruza abakoreshwa imibonano

Imyidagaduro   Yanditswe na: Dusingizimana Remy 28 September 2021

Umuririmbyi w’Umunyamerika R Kelly yahamwe no gukoresha nabi kuba ari icyamamare agashyiraho uburyo bwo guhohotera abagore n’abana abakoresha imibonano mpuzabitsina mu gihe cy’imyaka makumyabiri.


Abamushinja cumi n’umwe, bagizwe n’abagore icyenda n’abagabo babiri, batanze ubuhamya muri uru rubanza rwamaze ibyumweru bitandatu, bavuga uburyo bw’imibonano mpuzabitsina bukojeje isoni bakoreshejwe ndetse n’urugomo bakorewe.

Nyuma y’iminsi ibiri ikora isuzuma, inteko y’abacamanza yasanze Kelly, w’imyaka 54, ahamwa n’ibyaha byose yaregwaga.

Kumukatira igihano byitezwe kuba ku itariki ya 4 y’ukwezi kwa gatanu kandi bishoboka ko ashobora kumara igihe gisigaye cy’ubuzima bwe afunze.

Inteko y’abacamanza yasanze Kelly, ubundi izina rye mu buryo burambuye ni Robert Sylvester Kelly, yari akuriye igico cy’abantu gikoresha urugomo n’agahato cyareshyaga abagore n’abana kugira ngo abakorere ihohotera rishingiye ku gitsina.

Uyu muririmbyi - wamamaye cyane mu ndirimbo ye yahawe igihembo yitwa I Believe I Can Fly - yanahamwe no gucuruza abagore hagati ya za leta zitandukanye z’Amerika no gukoresha abana filime z’urukozasoni (child pornography).

Hamwe n’ibirego umunani byo gucuruza abantu hagamijwe kubakoresha imibonano, Kelly yanahamwe no gukora ubucuruzi bunyuranyije n’amategeko - ikirego ubusanzwe kiregwa abari mu mashyirahamwe y’ubugizi bwa nabi buteguwe.

’Niteguye gutangira kubaho ubuzima bwanjye nta bwoba’

Mu rubanza rwe, abashinjacyaha bavuye imuzi (barondoye) uburyo abakuriye abakozi be, abamucungira umutekano n’abandi bamuri hafi bakoze mu kumufasha mu bugizi bwa nabi bwe.

Umugore umwe, watanze ubuhamya ko Kelly yamufunze, akamuha ibiyobyabwenge ndetse akamukoresha imibonano mpuzabitsina ku ngufu, mu itangazo ryanditse yasohoye nyuma y’umwanzuro w’urukiko yavuze ko yari amaze igihe "yihisha" "kubera inkeke nashyirwagaho" na Kelly, kuva uwo mugore yatangaza ku mugaragaro ibyo amushinja.

Uwo mugore, umwirondoro we watanzwe mu rukiko nka Sonja, yongeyeho ati: "Niteguye gutangira kubaho ubuzima bwanjye nta bwoba no gutangira urugendo rwo gukira ibikomere".

Lizette Martinez, undi mugore watanze ubuhamya mu rukiko, yavuze ko "aruhuwe" n’uyu mwanzuro.

Yongeyeho ati: "Ntewe ishema cyane n’abagore bashoboye kuvuga ukuri kwabo".

Inyandiko z’urukiko zanahishuye guhungabanya mu bitekerezo Kelly yakoreraga abo yahohoteraga.

Ntabwo bari bemerewe kurya cyangwa gukoresha ubwiherero atabahaye uruhushya, yagenzuraga imyenda bambara ndetse agatuma bamuhamagara "Papa".

Undi mutangabuhamya umwe - mu gushinja Kelly wiswe Jane Doe No 5 - yavuze ko yamuhohoteye kenshi mu gihe cy’imyaka itanu bamaranye kuva mu 2015 ubwo uyu mukobwa yari afite imyaka 17 ashaka kuzaba umuririmbyi.

Ku myaka 23 ubu, avuga ko yanduye zona (herpes) ku myaka 17 nyuma yo kuryamana na Kelly. Avuga ko atamubwiye ko yari afite indwara yandurira mu mibonano mpuzabitsina, kandi yaragombaga kubikora.

Jane yagize ati: "Uyu mugabo yanyanduje ikintu yari azi neza ko arwaye, kandi yashoboraga kubyirinda." Umuganga wa R. Kelly nyuma yemeje ko uyu muhanzi yafashe imiti ya zona kuva mu 2007.

Ubwo Jane Doe yabimubazaga, "yararakaye cyane, ambwira ko nshobora kuba narayikuye ahandi. Mubwira ko nta wundi twaryamanye." Ubwo yari atagishoboye gukora imibonano mpuzabitsina kubera ububabare, Kelly byaramurakaje avuga ko umubiri we "warangiye".

Gloria Allred, umwunganizi mu mategeko waburaniye benshi mu bo Kelly yahohoteye, yabwiye abanyamakuru ati:

"Maze imyaka 47 ndi umunyamategeko. Muri iki gihe, nakurikiranye abantu benshi bakora ihohotera rishingiye ku gitsina bakoreye ibyaha abagore n’abana".

"Muri abo bakora ihohotera bose nakurikiranye, Bwana Kelly ni we wa mbere mubi cyane".

Mu kiganiro n’abanyamakuru hanze y’urukiko ku wa mbere, umushinjacyaha Jacquelyn Kasulis yavuze ko inteko y’abacamanza yatanze ubutumwa ku bagabo b’ibikomerezwa nka Kelly.

Madamu Kasulis yagize ati: "Igihe byafata icyo ari cyo cyose, ukuboko kw’amategeko kuzagufata".

Uyu mwanzuro w’urukiko ugezweho nyuma y’imyaka 13 Kelly agizwe umwere ku birego byo gukoresha abana filime z’urukozasoni nyuma y’urubanza rwabereye muri leta ya Illinois.

Byinshi mu birego byumviswe muri uru rubanza byatangajwe bwa mbere muri filime mbarankuru yatangajwe mu 2019 yiswe ’Surviving R Kelly’, cyangwa Kurokoka R Kelly, ugenekereje mu Kinyarwanda.

Rimwe na rimwe abakorewe ihohoterwa batoranywaga mu bitabiriye ibitaramo bye, cyangwa bakareshywa ngo bamusange nyuma yo guhabwa ubufasha mu muziki wabo wari ukiri ku rwego rwo hasi, bamaze kugira amahirwe yo guhura n’icyo cyamamare.

Ariko nyuma yo kugera mu bari hafi ye, basangaga bagomba gukurikiza amategeko akarishye kandi bagahanwa bikomeye iyo barengaga ku byo itsinda rye ryitaga "amategeko ya Rob".

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Bamwe mu banyarwanda bari kwamagana igitaramo cya Koffi Olomide I...

Bamwe mu Banyarwanda bari gusaba ko igitaramo cya Koffi Olomide...
25 November 2021 1

Davido yakoze igikorwa gitangaje mu mafaranga aheruka kohererezwa n’abafana...

Ubwo umuhanzi Davido yizihizaga isabukuru y’amavuko, yasabye abakunzi be...
22 November 2021 0

Umuraperi Fireman yagizwe umwere ku byaha yari akurikiranyweho

Urukiko Rukuru rwa Gisirikare rwagize umwere Uwimana Francis wamamaye mu...
18 November 2021 0

Iserukiramuco rya "HAMWE"rizanye undi mwihariko ku nshuro yaryo ya...

Kaminuza ya University of Global Health Equity (UGHE) yateguye...
10 November 2021 0

Abahanzi 5 bo mu Rwanda bigoye ko bategura igitaramo bonyine kikitabirwa na...

Umuziki nyarwanda ukomeje gutera imbere umunsi ku munsi! ibi nibyo...
9 November 2021 0

Imbonizarwo Music Band bashyize hanze indirimbo "Nzira iki" igaragaza...

Itsinda rikora umuziki rya "Imbonizarwo Music Band" ryashyize hanze...
9 November 2021 0