Mu rubanza rwa Donald Trump, abanyamategeko be bavuze ko abakunzi be bateye ingoro y’inteko i Washington ku wa 06 z’ukwa mbere ku bushake bwabo.

Sponsored Ad

Kuri uyu wa kabiri, nibwo byitezwe ko urubanza rwa Trump rutangira mu nteko ya sena, nyuma y’aho aterewe icyizere n’inteko ishinga amategeko umutwe w’Abadepite mu kwezi gushize.

Trump ashinjwa "gushyigikira imyigaragambyo” mu ijambo yahaye abakunzi be bari mu myigaragambyo mbere y’uko imvururu zaduka.Trump yavuze ko adashobora kujya kwiregura.

Abantu batanu barimo umupolisi barapfuye ubwo abarwanashyaka ba Trump bateraga ingoro y’inteko ya Capitol, igitero cyatumye abadepite, abasenateri n’abandi bakozi bo muri iyo nyubako bahunga bakajya kwihisha.

Donald Trump niwe mukuru w’igihugu mu mateka ya Leta Zunze Ubumwe za Amerika waterewe icyizere inshuro ebyiri zose n’Abadepite.

Mu kiganiro batanze ejo ku wa mbere, abanyamategeko ba Trump bavuze ko inyandiko za FBI zerekana ko iyi myigaragambyo yari yateguwe mbere y’igihe, ko rero Trump adashobora gushinjwa ko ari we wayikajije.

Bashimangira kandi ko uru rubanza ruhabanye n’itegeko nshinga kubera koTrump atakiri ku butegetsi, ubu ari umuturage usanzwe.

Bifatiye mu gahanga abantu "icyenda bashinzwe uru rubanza" bo mu ishyaka ry’aba Democrats bategereje guca uru rubanza.Babashinja "ubuhemu n’ubujiji" kubera uko bafashe ijambo Trump yashyikirije abakunzi be.

Aba banyamategeko bavuga ko uru rubanza ari "umukino wa politike" kandi ari "urugero rwa politike iteye isoni" y’aba Democrats bashaka bashaka gucecekesha utavuga rumwe nabo muri politike.

Banditse bati: "Uru rubanza ntirwigeze ruba urwo gushaka ubutabera".

Aba Democrats bavuga ko kuba Trump atarigeze yemera ko yatsinzwe na Joe Biden mu matora,n’amagambo rutwitsi yabwiye abakunzi be ku wa 06 z’ukwa mbere - byakongeje izi mvururu.

Uru rubanza rwitezwe gutangizwa n’impaka ziza kumara amasaha ane hanyuma habe gutora kugira ngo bemeze niba rukurikije itegekonshinga cyangwa se ruciye ukubiri naryo.

Nirukomeza nk’uko byitezwe, ejo ku wa gatatu ku gicamunsi hazahita hatangira gushinjanya aho buri ruhande ruzahabwa amasaha cumi n’atandatu yo kugaragaza aho ruhagaze.

Hagati aho, kugira ngo inteko ya Sena ishobore guhana Trump, izakenera kubona abasenateri 17 b’aba Repubulika bajya ku ruhande rw’aba Democrats kugira ngo haboneke bibiri bya gatatu bikenewe.

Ku wa 26 z’ukwa mbere, abasenateri b’aba Repubulika 45 kuri 50 nibo bemeje ko uru rubanza ruciye ukubiri n’itegekonshinga.

BBC