Uwahoze ari umuzamu wa Uganda Cranes, Denis Onyangoukinira Mamelodi Sundowns,uherutse gusezera mu ikipe y’igihugu yashimiwe na Perezida Yoweri Kaguta Museveni kubera ishema yahesheje igihugu amuha imodoka nshya ya V8.

Sponsored Ad

Perezida Museveni na Madamu we Janet Museveni na Minisitiri ushinzwe uburezi na Sports n’abandi banyacyubahiro bitabiriye ibi birori byo gushimira uyu munyabigwi byabereye ku biro by’umukuru w’igihugu i Entebbe.

Onyango w’imyaka 36,aherutse gusezera mu ikipe y’igihugu nyuma y’imyaka 16 akinira iyi kipe aho yahamagawe inshuro 70 guhera muri 2005.

Onyango yasezeye mu ikipe y’igihugu kuwa 12 Mata 2021,nyuma y’aho yari imaze kubura itike yo kwerekeza mu gikombe cya Afurika.

Uyu munyezamu w’Umunyabigwi muri Uganda,yageze iwabo ejo kuwa Kane kugira ngo aze gushimirwa uyu munsi hanyuma ahite asubira muri Afurika y’Epfo kwitegura umukino ikipe ye ya Sundowns izakina na TS Galaxy.

Gusezera kwa Onyango na bagenzi be barimo Hassan Wasswa na Michael Azira,byateye umwuka mubi mu nteko ishinga amategeko bituma abadepite bahamagaza minisitiri wa siporo,Hamson Obua ngo atange ibisobanuro.

Onyango yafashije Uganda gukina ibikombe 2 byikurikiranya bya Afurika ndetse atwara Caf Champions League muri 2016 ari kumwe na Mamelodi Sundowns izwi nka Masandawana.

Onyango yatowe nk’umunyezamu wa mbere muri Afurika aba n’uwa 10 ku isi muri uwo mwaka.