Thomas Lubanga washinzwe umutwe witwaje intwaro wa FRP (Force pour la révolution populaire) urwanya ubutegetsi bwa Repubulika Iharanira Demokarasi ya Congo, yashimangiye ko Perezida Félix Tshisekedi agomba gukurwa ku butegetsi.

Mu kiganiro yagiranye n’abanyamakuru i Kampala kuri uyu wa 16 Nyakanga 2025, Lubanga yasobanuye ko ubutegetsi bwa RDC bwamuhigaga kubera ko yamaganaga ibyaha by’iyezandonke byabumunze ndetse no kunanirwa inshingano, afata icyemezo cyo guhungira muri Uganda.

Yagize ati “Perezida Thomas Lubanga, ari we njyewe, ari mu buhungiro yahatirijwe kujyamo i Kampala bitewe n’itotezwa we na bagenzi be bakorewe kubera ko bamaganye iyezandonke n’ubushobozi buke bwa Guverinoma yo ku rwego rw’intara n’urw’igihugu.”

Lubanga yagaragaje ko ubutegetsi bwa Tshisekedi bukwiye gukurwaho vuba, bityo ko ashyigikiye ihuriro AFC/M23 n’abandi banyapolitiki bakomeje urugamba rwo kuburwanya.

Ati “Dushima kandi dushyigikiye impamvu ya AFC/M23, abanyapolitiki batavuga rumwe n’ubutegetsi n’abavuga abaturage bakumva. Agakiza ka RDC kari mu gukuraho vuba Bwana Felix Antoine Tshisekedi.”

Raporo nshya y’impuguke z’Umuryango w’Abibumbye ihamya ko Uganda icumbikiye Lubanga kuva muri Nyakanga 2024, ndetse ngo banashyigikiwe n’ubutegetsi bwa Perezida Yoweri Museveni.

Muri iki kiganiro, Lubanga yatangaje ko ibyerekeye kuri we biri muri iyi raporo ari ibinyoma kuko ngo iyo aba afashwa na Leta ya Uganda, abarwanyi be baba bari ku marembo y’umurwa mukuru wa RDC, Kinshasa.

Lubanga yashinzwe ishyaka CRP (Convention pour la revolution Populaire) hamwe n’umutwe wa FRP tariki ya 10 Mutarama 2025, afite intego yo gukuraho ubutegetsi bwa Tshisekedi. Abarwanyi be bakorera mu ntara ya Ituri mu burasirazuba bwa RDC.