Imitwe yitwaje intwaro iba mu ihuriro Wazalendo rishyigikiwe n’ubutegetsi bwa Repubulika Iharanira Demokarasi ya Congo yahanganiye muri teritwari ya Walikale mu ntara ya Kivu y’Amajyaruguru.

Iyi mirwano yabereye mu gace ka Nkobe muri gurupoma ya Kisimba tariki ya 20 Kanama 2025, yahanganishije umutwe wa NDC-R na UPR (Union des Patriotes Résistants) nyuma yo gushyamirana.

Amakuru ava i Walikale asobanura ko abarwanyi ba NDC-R ari bo babanje kurasa ku ba UPR, hahita hapfa batatu, abandi batandatu barakomereka, bamwe bajyanwa ku ivuriro rya Munsanga, abandi bajyanwa muri Pinga.

Iyi mitwe yombi isanzwe yifatanya mu guhangana n’abarwanyi b’umutwe witwaje intwaro wa M23 bakorera muri Walikale. Ubuyobozi bwa Kisimba bugaragaza ko aya makimbirane adakemuwe vuba, M23 ishobora kubyungukiramo.

Umuyobozi wa Kisimba, Lavie Changwi, yatabaje igisirikare cya Leta gisanzwe gikorana na Wazalendo, agisaba ko cyafasha iyi mitwe gukemura amakimbirane ifitanye hakiri kare.