Umunyamabanga w’u Bwongereza ushinze ububanyi n’amahanga, Dominic Rennie Raab aherutse gutangaza ko igihugu cye cyiteguye gusaranganya urukingo rwa Covid-19 n’ibihugu bikennye.

Sponsored Ad

Ni nyuma y’aho bamwe mu bayobozi mu bihugu bikennye n’imiryango mpuzamahanga bakomeje kunenga ibihugu bikize birimo n’u Bwongereza, bibishinja gushaka kwikubira inkingo zose za Covid-19.

Raab mu kiganiro yagiranye na Evening Standard tariki ya 29 Mutarama 2021, yavuze ko u Bwongereza burajwe ishinga n’ubuzima ku rwego mpuzamahanga. Ati: “Indwara z’ibyorezo ntizubaha imipaka. Birumvikana ko kurinda Covid-19 ibihugu bikennye, ari ukurokora ubuzima bwa miliyoni z’abantu.”

Kubera iyi mpamvu, ngo iki gihugu ubwacyo kizashyigikira ko hatabaho ukwikubira izi nkingo, mu buvuzi ndetse no mu gufata ibipimo bya Covid-19.

Ati: “Ni yo mpamvu ari ngombwa ko gushyigikira gusaranganya inkingo mu buryo bungana, mu buvuzi ndetse no mu gupima mu bihugu biri mu nzira y’iterambere. U Bwongereza buri imbere mu guharanira ko ibi byagerwaho.”

Kuvuga ko buri imbere mu gushyigikira iyi gahunda, Dominic Rennie Raab abishingira ku kuba u Bwongereza bwarahaye ibihugu bikennye inkunga y’Amapawundi miliyari 1.3, yo kwifashisha mu kurwanya Covid-19 na miliyoni 500 zo gushyigikira gahunda ya Covax yo kugeza inkingo miliyari 1.3 mu bihugu 92 bikennye.

Umukuru w’u Rwanda, Perezida Paul Kagame aherutse gutangaza ko kuba ibihugu bikize byo ku mugabane w’u Burayi na Amerika y’Amajyaruguru bikomeje kwikubira inkingo, bigasaba inyinshi kuruta izo bikeneye, bizatuma ibihugu biri mu nzira y’iterambere bizibura, mu gihe byaba bikomeje bitya, icyorezo kitazarekera kuzahaza Isi, kuko hakenewe ingamba Isi ihuriyeho.