Kuri uyu wa 11 Gashyantare 2021, indege yo mu bwoko bwa Kajugujugu yakoreshwaga mu myitozo n’ingabo za Uganda yakoze impanuka, igwa hafi y’ibirindiro by’ingabo zirwanira mu kirere bya Entebbe, abasirikare babiri barimo bihutishirizwa ku bitaro.

Umuvugizi w’ingabo za Uganda, Brig. Gen. Flavia Byekwaso yemereje ku rubuga rwa Twitter ko iyi mpanuka yabaye saa munani n’iminota 15 ku masaha yo muri Uganda, ubwo aba basirikare bari mu myitozo bari bari bamaze kuyihagurutsa.

Ati: “Uyu munsi ahagana saa 2:15pm, indege yari itwaye n’abanyeshuri bari mu myitozo, yahanutse nyuma yo guhagurukira hafi ya Libido beach. Bombi bihutishirijwe ku bitaro kugira ngo ubuzima bwabo bwitabweho.”

Daily Monitor ivuga ko iyi mpanuka imaze kuba, Imbangukiragutabara (ambulance) yahise ihagera, ibajyana mu bitaro bya Kisubi biri muri Kampala.

Gen. Byekwaso yatangaje ko itsinda rishinzwe gukora iperereza kuri iyi mpanuka ryahageze kugira ngo rishakishe icyayiteye.