Abasirikare bagera ku 10 barapfuye abandi barindwi barakomereka mu gitero cyagabwe mu karere ka Dosso muri Niger muri iki cyumweru, nk’uko abayobozi batangaje mu itangazo ryatambutse kuri radiyo y’igihugu, mu gihe amakuru ava mu nzego z’umutekano agera kuri Reuters avuga ko abapfuye bashobora kuba benshi.

Sponsored Ad

Iri tangazo ryerekanye ko igico cyo ku wa Mbere mu majyepfo ya Niger ari “iterabwoba” kandi rivuga ko benshi mu bagabye igitero bishwe abandi bagafatwa.

Kimwe n’abaturanyi bo muri Sahel, Mali na Burkina Faso, igihugu cya Niger nacyo gihangange n’inyeshyamba n’imitwe y’abajihadiste ifitanye isano na Al Qaeda na Leta ya Kisilamu.

Amakuru ava mu nzego z’umutekano avuga ko abasirikare 18 baburiwe irengero kandi imodoka eshatu z’abashinzwe umutekano nazo zibwe.

Guverinoma yategetse ko hahagarikwa ikoreshwa rya moto mu baturage mu duce tudatekanye, nk’uko bigaragara mu mabwiriza Reuters yabonye.

Mu kwezi gushize, abasirikare 12 barapfuye ndetse Abahinde batanu barashimutwa mu gitero cyabereye muri Niger hafi y’akarere k’imivurungano gahana imbibi na Mali na Burkina Faso.