Hashize iminsi havugwa ikibazo cy’imicungire y’amakoperative n’imiyoborere yayo mu makoperative yo mu Rwanda kuburyo n’abanyamuryango bagiye bashinja bamwe mu bayayobora gucunga nabi no kunyereza umutungo wayo.

Sponsored Ad

Ibi bibazo by’imicungire nibyo kuri uyu wa Kabiri, Minisitiri w’Ubucuruzi n’Inganda, Sebahizi Prudence yasabweho ibisdobanuro n’abadepite.

Abadepite bashyikirije Minisiteri y’ubucuruzi n’Inganada ibibazo babonye mu igenzura bakoze byiganjemo ubumenyi buke bw’abayobora amakoperative, imiyoborere mibi n’imicungire mibi y’abayobozi badafite ubunyangamuga n’abanyamuryango badakurikirana imicungire y’amakoperative babarizwamo.

Abadepite bavuze ko Ikibazao cy’ imiyoborere n’imicungire y’amakoperative itanoze gikomeje kudindiza iterambere ryayo maze basaba Minisitiri w’ubucuruzi n’inganda gutanga ibisobanuro. Mu rutonde rw’ib ibazo boherereje iyi minisiteri mbere bagize bati “ Nk’urugero rw’amakoperative abayobozi n’abacungamari banyereza umutungo wayo nka Koperative yo mu Karere ka Gicumbi yitwa Koperative Ihuza Aborozi ba Kijyambere Bafatanyije (IAKIB) ifitiye umwenda abanyamuryango bayo, Banki ya Kigali, na HEZA international yananiwe kubishyura umwenda urenga Miliyari y’amafaranga y’u Rwanda.

Abadepite basabye Minisitiri w’Ubucuruzi n’Inganda gusobanura neza ingamba zatuma ibibazo nk’ibi bikemuka, amakoperative akarushaho gukora neza kandi akagirira akamaro abanyamuryango.

Minisitiri w’Ubucuruzi n’Inganda, Sebahizi Prudence yasubije abadepite ko havugururwe itegeko rigenga amakoperative bakabona ko bizakemura ikibazo nko kongera manda y’abayobora Koperative ikava ku myaka itatu ikajya ku myaka 5 bikazavashaka ko abahabwa amahugurwa babasha gukomeza gukorera koperative neza.

Minisitiri yanasobanuye ko kimwe mu by’ingenzi bizafasha mu gukemura ibi bibazo kandi cyanashyizwe mu itegeko rishya No 057/2024 ryo ku wa 20/06/2024 rigenga Amakoperative mu Rwanda ari uko abayobozi bose b’amakoperative mu Rwanda bazajya bamenyekanisha imitungo batunze kugira ngo harebwe imitungo bafite nibiba ngombwa hakagira abahamwa no kunyereza imitungo ya koperative bayishyure bivuye muri iyo mitungo yabo.

Minisitiri yagize ati “ ikindi itegeko rishya riteganya ni uko abayobozi b’amakoperative bazajya bamenyekanisha imitungo yabo kuburyo igihe habaye imicungire mibi mu rwego rwo kubakurikirana bashobora no kuryozwa ibyo bangije hakoreshwa imitungo yabo mu gihe cyose izaba izwi.

Ingingo ya 148 y’iri tegeo iteganya ko uri mu nzego z’Ubuyobozi cyangwa umukozi wa koperative wanga kumenyekanisha umutungo, ukoze imenyekanishamutungo rituzuye cyangwa ritari ryo, aba bakoze ikosa. Ahanishwa ihazabu yo mu rwego rw’ubutegetsi ingana na 500.000 FRW. Naho ingingo ya 143 muri iri tegeko yo ikavuga ko abagize Inama y’Ubuyobozi baryozwa, umwe ku giti cye cyangwa bose, ibyo bahombeje cyangwa bangije, n’amakosa bakoreye koperative mu gihe bari mu mirimo yabo.

Uretse ibyo bibazo byagaragajwe, hari kandi amakoperative y’abahinzi adafite amakusanyirizo y’umusaruro, ubwanikiro n’ibindi bikorwa remezo byifashishwa mu kwita ku musaruro. Urugero rwatanzwe ni nko mu karere ka Rusizi mu murenge wa Gitambi ahagaragaye koperative itagira ubwanikiro bw’urusenda, mu karere ka Gasabo mu murenge wa Rutunga, ahari Koperative Abakumburwa ikorera mu gishanga cya Kajevuba ihinga umuceri idafite ubwanikiro n’uruganda rwabafasha mu kwita ku musaruro wabo.

Minsitiri w’ubucuruzi n’inganda akaba yabwiye abadepite ko iri tegeko rigenga Amakoperative mu Rwanda ryitezweho guca akajagari mu micungire no gusigasira ubukungu bw’amakoperative.

Kuva mu kwezi kwa Mbere uyu mwaka, mu Rwanda habarurwaga koperative zanditse zigera ku bihumbi 11, zibarizwamo 70% by’abakora akazi.