Abayobozi b’umutwe witwaje intwaro wa CODECO urwanya ubutegetsi bwa Repubulika Iharanira Demokarasi ya Congo bagiye gusaba imbabazi Umugaba Mukuru w’ingabo za Uganda, Gen Muhoozi Kainerugaba, kubera ibitero uwo mutwe wagabye kuri izo ngabo mu ntara ya Ituri.

Sponsored Ad

Itsinda ry’abayobozi ba CODECO barimo Visi Perezida w’ubwoko bw’Abalendu mu burasirazuba bwa RDC, Dunji Kulukpa Etienne, ryagiye i Kampala mu cyumweru gishize, nk’uko byasobanuwe n’ikinyamakuru Chimpreports.

Ryakiriwe n’Umugaba w’ingabo za Uganda zirwanira ku butaka, Lt Gen Kayanja Muhanga, n’Umuyobozi wa Diviziyo ya kane y’ingabo zirwanira ku butaka, Gen Maj Felix Busizoori, mbere yo guhura na Gen Muhoozi.

Mu ntangiriro za Werurwe 2025, abarwanyi ba CODECO bagabye ibitero ku ngabo za Uganda zari mu bikorwa byo kugarura amahoro n’umutekano mu gace ka Fataki gaherereye muri teritwari ya Djugu.

Colonel David Byaruhanga wa Uganda yapfiriye muri iyi mirwano, bivugwa ko yishwe n’iturika ry’imbunda ya RPG yagize ikibazo. Ingabo za Uganda na zo zatangaje ko zishe abarwanyi ba CODECO barenga 240.

Ingabo za Uganda zagiye muri Fataki nyuma y’aho Gen Muhoozi aburiye CODECO igizwe n’Abalendu ko nibadahagarika kwica Abanye-Congo barimo Abahima, zizabagabaho ibitero.

Mu nama y’abahagarariye uyu mutwe n’abofisiye bakuru ba Uganda, Gen Muhoozi yavuze ko imitwe ikorera muri ituri ikwiye kurambika intwaro, igatanga umusanzu mu kurinda umutekano w’abaturage.

Gen Muhoozi yagize ati “Uganda isanzwe ishyigikiye amahoro n’umutekano mu burasirazuba bwa RDC. Turasaba imitwe yose guhagarika ubugizi bwa nabi, igakorana natwe mu kurinda umutekano w’abaturage.”

Dunji yasobanuye ko ubwo CODECO yagabaga ibitero ku ngabo za Uganda, yari yayobejwe n’abagizi ba nabi, asobanura ko Abalendu nta kibazo bafitanye n’izi ngabo.

Ati “Twayobejwe n’ingabo z’abagizi ba nabi kugira ngo turwanye kuba kwa UPDF muri Fataki. Turicuza ibyabaye, tunashimangira ko Abalendu, Abahima n’Abalega nta kibazo dufitanye na Uganda cyangwa ingabo zayo.”

Ingabo za Uganda ziri mu bikorwa byo kugarura amahoro n’umutekano mu burasirazuba bwa RDC kuva mu Ugushyingo 2021. Byatangiye zirwanya umutwe w’iterabwoba wa ADF, zivugurura ubu butumwa ubwo byagaragaraga ko CODECO ikomeje kwica abasivili benshi.