Ihuriro ry’abarwanyi ba AFC/M23 bisubije ibice bitandukanye byo muri Teritwari ya Masisi, nyuma y’imirwano ikomeye yabahanganishije n’ingabo za Repubulika ya Demokarasi ya Congo n’abambari bazo.

AFC/M23 yigaruriye ibice bya Luke, Kasenyi na Katobotobo, nyuma y’imirwano ikomeye yabahuje na FARDC, FDLR, Ingabo z’u Burundi, abacanshuro b’abazungu n’ihuriro rya Wazalendo.

Ni mu mirwano imaze iminsi ihanganishije impande zombi, aho ubutegetsi bwa Félix Tshisekedi bushaka kwisubiza santere ya Rubaya n’ibirombe byaho.

Amakuru, ataremezwa n’igisirikare cya Repubulika Iharanira Demokarasi ya Congo, avuga ko umwe mu ba jenerali bacyo yaguye muri iyo mirwano.

Ni mu gihe, kuva mu rukerera rwo kuri uyu wa Kane, tariki 26 Gashyantare 2026, imirwano ikomeye ikomeje kubera i Kazinga, aho M23 ishaka kwisubiza ako gace.

Amakuru avuga ko FARDC iri gukoresha indege zitagira abapilote (drones) zoherezwa n’abacanshuro bakomoka mu gihugu cy’Ubufaransa.

Abo bacanshuro basaga 200 bakomoka mu Ubufaransa, bari kumwe n’abo mu Bubiligi, bashinze “base militaire” muri Walikale.

Ni mu gihe abandi bagera kuri 200 bari i Kinshasa, bakaba bategerejwe koherezwa ku zindi ‘axes’ z’urugamba.

Abo bacanshuro ni na bo bivugwa ko bagabye igitero cya drones muri santere ya Rubaya ku wa Kabiri, cyahitanye Lt. Col. Willy Ngoma, wari Umuvugizi wa Gisirikare wa AFC/M23.

Umuyobozi wungirije wa AFC/M23 ushinzwe ibikorwa bya politiki, dipolomasi n’imiyoborere, Bertrand Bisimwa, mu butumwa bwo kuri X, yavuze ko Repubulika ya Demokarasi ya Congo yahisemo inzira y’intambara.

Ubutegetsi bwa Tshisekedi bwiyambaje ibihugu birimo Angola, Malawi, Tanzania, Burundi, Afurika y’Epfo, ndetse n’abacanshuro bakomoka mu bufaransa, U Bubiligi, n’Amerika, bikavugwa ko n’abo muri Romania bagarutse guhangana na M23.