Agaciro ka Microsoft kageze kuri miliyari 4000$, iba ikigo cya kabiri kigeze kuri uru rwego, nyuma ya Nvidia yabigezeho mu ntangiriro za Nyakanga 2025.

Imigabane y’iki kigo cy’ikoranabuhanga yazamutse ku kigero cya 4,5% nyuma y’uko isoko ry’imari n’imigabane rifunguye ku wa 31 Nyakanga 2025, bituma umutungo wacyo ugera kuri miliyari 4010$.

Imigabane yayo yazamutseho hafi 28% kuva uyu mwaka watangira.

Ni intambwe iki kigo kigezeho mu gihe nyuma y’umwaka n’igice cyari kiri kwishimira indi ntambwe y’uko cyari kigeze ku gaciro ka miliyari 3000$.

Muri Mata 2019 ni bwo Microsoft yateye intambwe ikomeye igera ku gaciro ka miliyari 1000$.

Iki kigo cy’ikoranabuhanga kiri giteganya ko mu 2025/2025 kizakoresha hafi miliyari 30$ hagamijwe kwimakaza ikoranabuhanga ry’ubwenge buhangano.

Ugereranyije n’ibindi bigo nka Nvidia cyangwa Apple ubona ko kugera kuri miliyari 3000$ byatwaye igihe kinini Microsoft kuko nka Nvidia yakubye agaciro kayo gatatu mu mwaka umwe ndetse ku wa 9 Nyakanga 2025 iba ikigo cya mbere kigeze ku gaciro ka miliyari 4000$ ku isoko ry’imari.

Ubu Apple yo ifite agaciro ka miliyari 3.120$.

Microsoft yarazamutse, igera ku kigero cya 50% uvuye muri Mata 2025 nyuma y’uko ibintu byari byazambye bigizwemo uruhare n’imisoro mishya Amerika yari yashyiriyeho ibihugu.

Ikigo cya OpenAI gisanzwe ari umufatanyabikorwa wa Microsoft cyagize uruhare mu kuzamuka kw’agaciro kayo.

Microsoft yiyemeje kwisunga AI igakoresha abakozi bake. Mu nyangiriro za 2025 yatangaje ko izasezerera abakozi barenga 9000.

Microsoft ifite icyicaro mu Mujyi wa Redmond muri Leta ya Washington yashinzwe n’abanyemari barimo Bill Gates na Paul Allen mu 1975. Ubu ikoresha abakozi barenga ibihumbi 228 ku Isi hose.