Amazon iri mu biganiro byo gushora ashobora kugera kuri 50 z’Amadolari ya Amerika muri OpenAI yakoze porogaramu y’ubwenge bw’ubukorano ya ChatGPT.

Amakuru y’iri shoramari rya Amazon yatangajwe na Reuters. Ibi biganiro biri mu ntangiriro. Amafaranga nyirizina ateganywa gushorwa ntaratangazwa ku mugaragaro.

Umuyobozi Mukuru wa Amazon, Andy Jassy, ni we uri kuyobora ibiganiro hamwe na Sam Altman, uyobora OpenAI.

OpenAI, ikomeje gushora amafaranga menshi mu kubaka ibigo bibika amakuru [data centers], iri gushaka inkunga igera kuri miliyari 100$, ishobora gutuma igira agaciro ka miliyari 830$. SoftBank Group nayo iri mu biganiro byo gushora miliyari 30$.

Ku rundi ruhande OpenAI, iherutse gusinyana na Sosiyete ya Cerebras amasezerano afite agaciro ka miliyari 10$, irateganya gutangira kugurisha imigabane yayo ku isoko ry’imari n’imigabane ku nshuro ya mbere, ibishobora gutuma ibarirwa agaciro ka miliyari 1000$.

Gushora miliyari 50$ byatuma Amazon iba umuterankunga mukuru muri gahunda ya OpenAI yo gukusanya inkunga. Amazon kandi yanashoye imari ya miliyari 8$ muri Sosiyete ya Anthropic, ibarirwa agaciro ka miliyari 183$.

Ibigo binini biri kumaranira gushora imari muri sosiyete z’ikoranabuhanga ry’ubwenge buhangano ‘AI’ nka OpenAI irajwe ishinga no gushora imbaraga mu bigo by’amakuru, mu cyizere ko bizabiha ubushobozi kuri iri koranabuhanga rya ‘AI’ rikomeje kwimakazwa muri byinshi.

Ibindi bigo nka Nvidia na Microsoft nabyo biri mu biganiro byo gushora amafaranga muri OpenAI, aho Nvidia iteganya gutanga miliyari 30$ mu ishoramari, mu gihe Microsoft ishaka gutanga munsi ya miliyari 10$. Ibi bigo byombi bimaze igihe kinini byinjiye mu bufatanye na OpenAI mu mikoreshereze ya zimwe muri serivisi zayo.