Ambasaderi w’u Rwanda mu Bwongereza, Johnston Busingye, yifatanyije n’icyo gihugu mu gikorwa cyo kwibuka no kunamira abacyitangiye mu Ntambara y’Isi ya mbere n’iya kabiri n’andi makimbirane yakurikiyeho, ndetse n’abandi barwanye ku ruhande rw’ibihugu bigize umuryango wa Commonwealth.

Ni igikorwa cyabaye ku Cyumweru ku itariki 9 Nzeri 2025 i Londres ahazwi nka Whitehall hari ikibumbano cy’urwibutso ku baguye muri izo ntambara.

Ni igikorwa cyitabiriwe n’Abongereza n’abayobozi babo barimo Umwami Charles III, Minisitiri w’Intebe wabwo, Keir Starmer ndetse n’abahagarariye ibihugu byabo muri icyo gihugu barimo na Ambasaderi Johnston Busingye uhagarariye u Rwanda.

Ni igikorwa kandi cyabereye n’ahandi mu Bwongereza mu mijyi nka Edinburgh, Belfast na Cardiff.

Muri uwo muhango hashyizwe indabo ku mbuga ngari iri imbere y’icyo kibumbano ndetse bafata iminota ibiri yo kwibuka mu rwego rwo guha icyubahiro abaguye muri izo ntambara zombi n’andi makimbirane.

Muri icyo gikorwa kandi abahoze mu gisirikare cy’u Bwongereza bagera kuri 10.000 barimo abagera kuri 20 barwanye mu Ntambara ya II y’Isi bakoze akarasisi.

Mu Bwongereza icyo gikorwa kiba buri mwaka ku Cyumweru cya kabiri cy’Ugushyingo kuko ari cyo kibanzirizia itariki ya 11 Ugushyingo Intambara y’Isi ya Mbere yarangiriyeho mu 1918.

Muri uyu mwaka uwo munsi wanahuriranye no kwizihiza imyaka 80 ishize Intambara ya Kabiri y’Isi irangiye.

Minisitiri w’Intebe w’u Bwongereza, Keir Starmer yavuze ko uwo munsi wibutsa Abongereza intwari zabo zarwaniye bimwe mu byo bagezeho uyu munsi.

Ati: “Uyu munsi tuzirikana umuhate udasanzwe waranze Igisirikare cyacu mu ntambara n’andi makimbirane yakurikiyeho. Ibikorwa byabyo ni byo byatumye tugera ku bwisanzure dufite uyu munsi.”

Mu ntambara z’Isi zose u Bwongereza bwarwanye ku mpande zibarwa nk’izatsinze intambara.

Gusa mu Ntambara ya Mbere y’Isi yose yabaye mu 1914-1918 u Bwongereza habarwa ko bwapfushije abasirikare babarirwa muri 886.000 mu gihe mu Ntambara ya Kabiri y’Isi yabaye kuva mu 1939-1945 bwapfushije abasirikare ababarirwa muri 384.000.

Abantu benshi bitabiriye iki gikorwa cyo kwibuka Abongereza baguye mu ntambara

Icyo gikorwa cyo kwibuka cyayobowe n’Umwani w’u Bwongereza, Charles III