Ambasaderi w’u Rwanda mu ishami ry’Umuryango w’Abibumbye rishinzwe guteza imbere uburezi, siyansi n’umuco (UNESCO), Nkulikiyimfura François, yagaragaje intambwe ikomeye u Rwanda rwateye mu guteza imbere uburezi mu myaka itanu ishize.

Mu Nteko Rusange ya UNESCO yabereye mu mujyi wa Samarkand muri Uzbekistan, Ambasaderi Nkulikiyimfura yagaragaje ko mu myaka itanu ishize, haguwe ibikorwaremezo by’uburezi, hazamurwa ireme rwabyo, abakiri bato basobanukirwa akamaro k’ishuri.

Ati: "Mu mashuri abanza n’ayisumbuye, twibanze ku gutanga ibikoresho bya ngombwa byo kwigiraho, twongera ubushobozi bw’abarimu bacu, twongere ibikorwaremezo by’amashuri, twagura gahunda yo kugaburira abana mu mashuri kugira ngo abana bose babone amahirwe yo kwiga, gukura no gutera imbere.”

Yagaragaje ko mu myaka itanu iri imbere, u Rwanda rufite intego nyamukuru yo kurushaho guteza imbere ireme ry’uburezi no kubuhuza n’ibikenewe ku isoko ry’umurimo hashingiwe ku ntego z’iterambere rirambye za 2030.

Ambasaderi Nkulikiyimfura yasobanuye ko mu rwego rwo guteza imbere ikoranabuhanga mu burezi, Guverinoma y’u Rwanda ikomeje guha amashuri ibikoresho birimo mudasobwa na internet, inaha abarimu amahugurwa y’ikoranabuhanga.

Igenamigambi mu iterambere ry’uburezi rya 2024-2029 rigaragaza ko u Rwanda ruteganya kubaka ibyumba by’amashuri birenga ibihumbi birenga 37 no kuvugurura ibindi birenga ibihumbi 12; byose bikazatwara miliyari 680 Frw.

Muri iyi myaka itanu, Guverinoma y’u Rwanda iteganya ko mu mashuri yisumbuye hazubakwa laboratwari 409 za siyansi, zikazatwara miliyari 53 Fw.

Mu mfashanyigisho zizagurirwa ibigo by’amashuri harimo ibitabo n’ibindi bikoresho bifasha abanyeshuri kumva neza ibyo bigishwa. Byateganyirijwe miliyari 51 Frw mu myaka itanu.

Ambasaderi Nkulikiyimfura yagaragaje ko u Rwanda rutakataje mu burezi gusa, kuko rwafunguye n’imbuga z’ihangiro ry’ibishya nka Youth Connekt Africa, zihuza urubyiruko rwo muri Afurika, rugakorana, rugasangira ubumenyi buzarufasha kuba abayobozi beza b’ahazaza.

Mu ikoranabuhanga muri rusange, Ambasaderi Nkulikiyimfura yasobanuye ko u Rwanda rwifashisha ubwenge buhangano (AI) nk’imbarutso y’iterambere ry’ikoranabuhanga, kandi ko rukomeje gukwirakwiza internet hose rwifashishije ‘Fibre Optique’.

Ambasaderi Nkulikiyimfura yatangaje ko u Rwanda ruzakomeza guhuza uburezi n’ibikenewe ku isoko ry’umurimo

Inteko Rusange ya UNESCO yitabiriwe n’ibihugu byo ku migabane yose