Ikibazo gikomeje kwibazwa na benshi bakunda cyangwa bakurikira ibijyanye n’isanzure, ni ukumenya niba Ikigo cy’Abanyamerika gishinzwe iby’Isanzure, NASA, kizabasha kongera kohereza abahanga mu by’isanzure [aba-astronauts] ku Kwezi.

Iki kigo giteganya kuzakoresha ‘rocket’ yifashishwa mu kohereza ibyogajuru mu Isanzure yitwa ‘Starship’ y’Ikigo cya SpaceX mu mushinga wo kongera kohereza umuntu ku Kwezi, Artemis III, bitarenze umwaka wa 2030.

Iyi rocket ni yo nini mu zigeze zibaho zose.

Aha ni ho hari ishingiro rya cya kibazo.

Mu nshuro 10 iyi rocket imaze kugeragezwa kugeza magingo aya, esheshatu muri zo ntizagenze neza kubera ibibazo byiganjemo ibya tekinike dore ko hari n’inshuro rocket yaturitse yose.

Igerageza rya 11 riteganyijwe kuri uyu wa mbere mu Majyepfo ya Texas.

Indi mbogamizi ikomeye ni uburyo Starship izajya yongererwa amavuta mu isanzure [orbital refueling] kugira ngo igere ku Kwezi. Kubera ubunini bwayo, ntibyashoboka ko yatwara amavuta yose iva ku butaka, ahubwo igomba kugera mu isanzure mbere yo kongererwa andi.

Iki gikorwa ntikirigera gikorwa mbere ku cyogajuru runaka gifite ubunini nk’ubwa bwa Starship. Ndetse na Starship ubwayo ntirakorerwa iri geragezwa.

Inzobere ntizemeranya neza inshuro hazakorwa ingendo z’ibyogajuru byatwara amavuta biyashyiriye Starship mu isanzure, ariko imibare y’ikigereranyo igaragaza ko zishobora kuba hagati ya 10 na 40, bitewe n’ubwoko bwa Starship n’ubutumwa bwayo.

Ibi byose ni ingenzi kugira ngo Starship ijye ku Kwezi, ihagere neza, kandi ibashe kugaruka amahoro.

Ikindi ni uko aba-astronauts bazajyanwa ku Kwezi, bagomba kuva ku butaka bakabanza kwerekeza mu isanzure, bakazagezwaho n’icyogajuru cya Orion kizoherezwa na rocket ya Space Launch System [SLS].

Nyuma yo kugera mu isanzure, icyogajuru cya Orion kizihuza na Starship Human Landing System [HLS], izabageza ku gasongero k’igice cy’Amajyepfo y’Ukwezi.

Kugera kuri iki gice biragoye kandi kuhahagarara kw’icyogajuru ni ihurizo rikomeye kubera ko hari urubura rwinshi cyane. Iki ni ikindi kibazo gisaba gukemurwa neza mbere yo koherezayo abantu.

Abasesenguzi bavuga ko uburyo NASA yihitiyemo bugoye cyane ugereranyijwe n’ubwakoreshwaga mu butumwa bwa Apollo 11, kuko ho hakoreshejwe icyogajuru cya Saturn V kirimo aba-astronauts n’ibikoresho byose bari bakeneye.

Ibi ariko ntibihabwa agaciro kuko ngo ubutumwa bwa Apollo bwari ubw’igihe gito, ariko ubwa Artemis III bugamije kwiga byimbitse ku Kwezi no gukora ubundi bushakashatsi bityo bushobora gutwara igihe kinini kandi bigasaba ibikoresho n’ikoranabuhanga bihambaye.

NASA igaragaza ko ifitiye SpaceX icyizere muri uyu mushinga ishingiye ku mateka yayo, ariko hari impungenge ko hashobora kubaho gutinda kw’igihe cyateganyijwe.

Bamwe mu basesenguzi muri uru rwego muri Amerika bagaragaje izindi mpungenge zirimo ko u Bushinwa bukataje, kandi bushobora kubatanga kujyana umuntu ku Kwezi.

Ku rundi ruhande, Umuyobozi w’Agateganyo wa NASA, Sean Duffy, avuga ko afitiye icyizere SpaceX, kandi ko igihe cyateganyijwe kizagera byose biri ku murongo nk’uko byagenwe.