Meta yatangiye gufunga konti z’abana bafite imyaka iri munsi ya 16 bakoresha Facebook na Instagram muri Australia, mu gihe itegeko rizibakumiraho ribura icyumweru ngo ritangire kubahirizwa.

Mu kwezi gushize Meta yamenyesheje abakoresha imbuga zacyo bafite hagati y’imyaka 13 na 15 ko konti zabo zizatangira gufungwa ku wa 4 Ukuboza.

Imibare yerekana ko konti z’abantu ibihumbi 150 kuri Facebook n’izo kuri Instagram ibihumbi 350 zishobora kugirwaho ingaruka.

Itegeko rikumira abana ku mbuga nkoranyambaga muri Australia rizatangira kubahirizwa ku wa 10 Ukuboza, aho ibigo bitazaryubahiriza bizacibwa ihazabu ya miliyoni 49,5 z’amadorari ya Australia

Umuvugizi wa Meta yabwiye BBC ko "kubahiriza amategeko ari urugendo rukomeje kandi rugizwe n’intambwe nyinshi."

Ati "Mu gihe Meta yiyemeje gukurikiza amategeko, twemera ko hakenewe uburyo bwiza, bwateguwe neza kandi burinda umutekano"

Mu kwezi gushize, Meta yatangaje ko abakoresha imbuga zayo bafite munsi y’imyaka 16 bashobora kubika ubutumwa bwabo, amashusho, mbere y’uko konti zabo zifungwa.