Perezida w’intumwa zidasanzwe z’Umujyi akaba na Meya wa Bangui, Émile-Gros-Raymond Nakombo, yangiwe na bamwe mu bakozi kwinjira mu biro bye. Uyu wari wafashe ikiruhuko agiye kwitabira amatora y’abadepite yo mu Kuboza 2025, yagonganye na bamwe mu bakozi barakaye ndetse na Minisiteri y’ubutegetsi bw’igihugu.

Nyuma yo gufata ikiruhuko mu Kwakira agiye kwitabira amatora y’abadepite mu mpera z’umwaka ushize, icyemezo cya minisiteri y’ubutegetsi bw’igihugu cyari cyashyizeho itsinda ry’ubuyobozi bw’agateganyo. Mu gihe byari biteganijwe ko azasubukura imirimo ye ku wa Mbere, itariki 20 Mata, Émile-Gros-Raymond Nakombo yabujijwe kwinjira mu biro na bamwe mu bakozi.

Bukeye, yamaganye ibi imbere y’abanyamakuru, avuga ko ari umugambi wateguwe wo kumuhirika ku mirimo ye ku bufatanye na Minisiteri, anavuga ko ashaka kurega. Ati: “Niba mushaka ko tuba intangarugero muri iki gihugu, tugomba kubahiriza amategeko ubwacu dushyiraho.” Yakomeje agira ati: ” barakubwira bati:” ugiye mu kiruhuko, ariko ntuzagaruka. ”

Yibukije abantu bose ko, nk’uwashyizweho n’umukuru w’igihugu, Faustin-Archange Touadéra, uyu ari we gusa ufite ububasha bwo kumwirukana. Umuyobozi w’akarere ka Bangui yagize ati: “Ntabwo ari iteka rya minisitiri rizagena iherezo ryanjye, ntibishoboka.” Yongeyeho ati: “Nakoze imyaka 10 ndi umuyobozi wa Bangui. Nashoboye kuyobora umujyi mu nzego zose. Nazanye inkunga. Ibi ni ibintu biremereye.”

287e684b933f31d6c3a0c6807ff67b4b

Hanze y’umujyi, bamwe mu bakozi bigaragambyaga bakomeza kwanga kugaruka kwe. Bimwe mu byapa bari bitwaje usomaho amagambo agira ati: “Birahagije.” Umwe mu bakozi yagize ati: “Mu myaka icumi, yabaye intandaro y’amahano menshi: imicungire mibi y’umujyi, kunyereza umutungo, kudahemba, ndetse no kudateza imbere uburyo dukoramo akazi kacu… Birahagije.”

Umuyobozi wa Bangui yari yafashe ikiruhuko kugira ngo yiyamamaze mu nteko ishinga amategeko mu gace ka Sosso-Nakombo, mu majyepfo y’uburengerazuba bw’igihugu, mu matora rusange yabaye ku itariki ya 28 Ukuboza. Yaje gukuramo kandidatire ye kugira ngo yirinde guhangana n’abavandimwe be babiri, na bo bahatanira uwo mwanya.

Minisiteri y’ubutegetsi bw’igihugu ntacyo irabivugaho. Ariko nk’uko amakuru aturuka imbere abivuga, itegereje ibizava mu cyiciro cya kabiri cy’amatora y’amakomine ateganijwe ku itariki ya 26 Mata, mbere yo gushyiraho abayobozi bashya batowe.