Guverinoma ya Burkina Faso yasheshe amashyaka ya politiki yose yo mu gihugu ndetse n’amategeko agenga imikorere yayo.

Ibi ni ibyavuye mu Nama y’Abaminisitiri yabaye ku wa 29 Mutarama 2026. Yasize yemeje ko amashyaka ari muri iki gihugu akurwaho yose ndetse n’ibikorwa byayo bigahagarara.

Minisitiri w’umutekano w’imbere mu gihugu, Emile Zerbo, yavuze ko iri tegeko rishya riri mu mujyo wo kubaka igihugu kuko babonye ko ibikorwa by’ubugizi bwa nabi bikorerwa muri iki gihugu ahanini biterwa n’ubwinshi bw’amashyaka n’imitwe ya politiki.

Mbere y’uko Captain Ibrahim Traoré kuri ubu uyoboye Burkina Faso akura ku butegetsi Lt Col. Paul-Henri Sandaogo Damiba muri Nzeri 2022, iki gihugu cyari gifite amashyaka yanditse arenga 100, arimo 15 ahagarariwe muri guverinoma.

Iri tegeko rishya rikumira ibikorwa byose by’amashyaka, ishyirwaho ry’andi mashyaka ya politiki cyangwa imitwe ya politiki, amategeko agenga imikorere y’amashyaka, uko aterwa inkunga ndetse n’uko atora umuyobozi uyahagararira.

Itegeko rishya rigenga imiyoborere riracyari kunononsorwa ndetse rizatangazwa bidatinze. Ibikorwa byose by’amashyaka ya politike yakuweho bizegurirwa guverinoma.

Burkina Faso ni igihugu gikunze kwibasirwa n’imitwe y’iterabwoba itandukanye arimo iya Al Qaeda, na Islamic State, dore ko ari nayo ifite igice kinini muri iki gihugu.

Ubwo Traore yahirikaga ku butegetsi Lt Col Damiba wabaye Perezida wa Burkina Faso kuva muri Mutarama ageza Nzeri 2022, yasezeranyije abaturage gukuraho ibibangamiye umutekano wabo byose ndetse abizeza amatora bidatinze, gusa nyuma aza kwiyongeza indi myaka itanu yo kuyobora inzibacyuho.