Perezida w’Inteko Ishinga Amategeko y’u Burundi, Gélase Daniel Ndabirabe, yatangaje ko abadepite b’iki Gihugu bari mu mazi abira kubera amadeni batse muri banki bubaka amazu, none manda yabo ikaba igiye kurangira batarayishyura.

Sponsored Ad

Ndabirabe yabigarutseho mu nteko rusange ihuza abadepite, aho yavuze ko yagiriye bagenzi be inama yo kutubaka amazu mu nguzanyo bakamunanira.

Yabwiye abadepite bagenzi be ati: “Muragowe. Narababwiye ntimwanyumvira none dore manda irarangiye. Mwubatse amazu huti huti mu madeni, none mugiye mutayishyuye. Muragowe! None murajya he? Amerika n’i Burayi ntimuzahungirayo kubera ko bari kwirukana abirabura.”

Uyu mushingamategeko kandi yagaragaje ko hari abadepite bagenzi be bazanye abagore n’abana mu mujyi, akibaza iyo bazerekeza ubwo manda yabo izaba yamaze kurangira.

Amatora y’abagize Inteko Ishinga Amategeko y’u Burundi (umutwe w’abadepite) ateganyijwe ku wa 05 Kamena uyu mwaka.

Ni mu gihe ay’abasenateri yo azaba mu mpera z’ukwezi kwa Kanama.