Abagize urubyiruko rw’Imbonerakure 35 mu Burundi bagiye kumara ibyumweru bibiri bafungiye kuri Sitasiyo za Polisi kuri Komine Cibitoke mu Ntara ya Bujumbura, mu Burengerazuba bw’u Burundi, bazira ibirimo gucuruza lisansi.

SOS Media Burundi yanditse ko izo Mbonerakure zafashwe zikekwaho ubucuruzi bunyuranyije n’amategeko bwambukiranya umupaka ndetse no gufasha Abanye-Congo kwambuka Umugezi wa Rusizi utandukanya ibihugu byombi.

Izo mbonerakure zafashwe nyuma y’inama y’umutekano yabaye ku itariki 9 Mutarama 2026 iyobowe na Guverineri w’Intara ya Bujumbura, Maj. Gen. Aloys Ndayikengurukiye irimo n’abayobozi b’inzego z’ibanze, abashinzwe umutekano n’abahagarariye amadini.

Abagera kuri 15 bafatiwe ku musozi wa Nyamitanga mu gace ka Bukinanyana, 12 ku musozi wa Rukana abandi umunani bafatiwe ku musozi wa Rusiga mu Komine ya Cibitoke.

Bamwe bafatanywe ibicuruzwa binyuranyije n’amategeko birimo lisansi n’imyenda, abandi bafatwa bari kwambutsa rwihishwa Abanye-Congo bahungaga umutekano muke mu Burasirazuba bwa RDC.

Abayobozi basabye ko hakazwa ingamba z’umutekano ndetse abafashwe bakajya gufungirwa muri Gereza Nkuru ya Mpimba kuko muri Cibitoke nta gereza nyayo ihari.

Imbonerakure ni ishami ry’urubyiruko rya CNDD-FDD, rizwiho ibikorwa by’urugomo no guhohotera abantu mu buryo butandukanye.

Raporo y’Umuryango Iteka League yerekana ko kugeza mu 2025, Imbonerakure zagize uruhare mu kwica abantu barenga 110 mu gihugu.