Mu gihe Inteko Rusange ya 26 y’Umuryango wa EAPCCO (Eastern Africa Police Chiefs’ Cooperation Organization) izaba ibera mu Rwanda, ku nshuro ya mbere hazaba irushanwa rigamije kumurika ibikorwa ku myiteguro y’imitwe ya Polisi zo mu bihugu bigize umuryango ku guhangana n’ibihungabanya umutekano hifashishijwe intwaro na tekiniki ‘EAPCCO SWAT Challenge’.

Sponsored Ad

Mu gihe Inteko Rusange ya 26 y’Umuryango wa EAPCCO (Eastern Africa Police Chiefs’ Cooperation Organization) izaba ibera mu Rwanda, ku nshuro ya mbere hazaba irushanwa rigamije kumurika ibikorwa ku myiteguro y’imitwe ya Polisi zo mu bihugu bigize umuryango ku guhangana n’ibihungabanya umutekano hifashishijwe intwaro na tekiniki ‘EAPCCO SWAT Challenge’.

Iri rushanwa rizaba kuva ku itariki ya 29 kugeza ku ya 30 Mutarama 2025, mu kigo cy’amahugurwa yo kurwanya iterabwoba (CTTC) giherereye i Mayange mu Karere ka Bugesera.

Amakipe yatoranyijwe mu nzego z’umutekano mu bihugu bigize EAPCCO azarushanwa mu myitozo itandukanye igamije gusuzuma imbaraga z’umubiri, gukorera hamwe ndetse n’ubuhanga bujyanye n’amayeri yo guhangana n’ibihungabanya umutekano.

Iri rushanwa rizatanga amahirwe yo kwerekana ubushobozi bw’akarere mu guhangana n’ibihungabanya umutekano no kurushaho gusangira ubumenyi hagati y’amakipe azaryitabira. Ibihembo bizahabwa amakipe azitwara neza hashingiwe ku kugaragaza ubwitange no kuba indashyikirwa mu guhangana n’ibihungabanya umutekano.

Ibihugu bigize uyu muryango w’ubufatanye bw’abayobozi ba polisi muri Afurika y’iburasirazuba (EAPCCO)ni: U Burundi, Comoros, Repubulika ya Demokarasi ya Congo, Djibouti, Eritrea, Ethiopia, Kenya, u Rwanda, Seychelles, Somalia, Sudani y’Epfo, Sudani, Tanzaniya, na Uganda.

EAPCCO ni urwego rushinzwe kubahiriza amategeko rwashinzwe mu 1998 i Kampala, muri Uganda. Uyu muryango washyizweho kugira ngo ufashe inzego zishinzwe kubahiriza amategeko gukorera hamwe mu kurwanya ibyaha byambukiranya imipaka kandi byateguwe.

Igipolisi cy’u Rwanda (RNP) gisanzwe kitabira amarushanwa nk’aya nk’aho umwaka ushize cyitabiriye iryabereye muri Leta Zunze Ubumwe z’Abarabu rya ‘UAE SWAT Challenge 2024’ kandi kitwara neza. U Rwanda rukaba rumaze kwitabira aya marushanwa ya ‘UAE SWAT Challenge’ inshuro eshatu muri eshanu amaze gukinwa.

Ku itariki 7 Gashyantare 2024, ni bwo hasojwe amarushanwa ya ‘UAE SWAT Challenge’ yahurije hamwe ibihugu birenga 70 mu gihe amakipe yabiturutsemo yarengaga 100.

Ku munsi wanyuma wa UAE SWAT Challenge, Polisi y’igihugu y’u Rwanda ‘SWAT Team-1’ yegukanye umwanya wa mbere mu masomo y’inzitizi, itsinze amakipe 72 akomeye ya SWAT yaturutse impande zose z’isi.