Mu Ntara ya Khartoum muri Sudani, ku wa Gatatu hatangajwe abarwayi bashya 942 n’impfu 25 za Chorela nyuma y’uko ku wa Kabiri hari habonetse abanduye 1.177 n’abapfuye 45.

Sponsored Ad

Iki cyorezo cyibasiye iki gihugu nyuma y’icyumweru havuzwe ibitero bya drone bishinjwa umutwe w’inyeshyamba wa RSF (Rapid Support Forces), byangije amazi n’amashanyarazi mu murwa mukuru.

Ibitaro bigera kuri 90% biri mu duce tuberamo intambara ntibikibasha gutanga serivisi. Minisiteri y’Ubuzima ivuga ko kugera ku wa kabiri, abantu 172 bari bamaze kwicwa na Chorela mu cyumweru kimwe, kandi ko 90% muri bo ari abo muri Khartoum.

Kuva iki cyorezo cyakwaduka mu gihugu muri Kanama 2024, abantu ibihumbi 65 baranduye mu gihe abapfuye bamaze kurenga 1700.

Khartoum imaze imyaka ibiri yarahindutse indiri y’imirwano hagati y’ingabo za Leta n’inyeshyamba za RSF.

Guverinoma ishyigikiwe n’ingabo za leta yatangaje ko mu cyumweru gishize yirukanye abarwanyi ba RSF mu birindiro byabo mu Ntara ya Khartoum, nyuma y’amezi abiri basubiranye ibyo bice.