Ishyaka CNDD-FDD riri ku butegetsi bw’u Burundi ryikubiye imyanya yose yo mu Nteko Ishinga Amategeko, nyuma yo gutsinda amatora yabaye tariki ya 5 Kamena 2025.

Sponsored Ad

Komisiyo y’Amatora muri iki gihugu, CENI, ku wa 11 Kamena yagaragaje ko abakandida bose ba CNDD-FDD begukanye imyanya 100 bahataniraga n’abo mu yandi mashyaka ndetse n’abigenga mu ntara eshanu nshya z’u Burundi.

Abakandida bahataniraga imyanya 16 mu Ntara ya Buhumuza, 23 muri Bujumbura, 17 muri Burunga, 23 muri Butanyerera na 21 muri Gitega. Muri rusange, abatoye abakandida CNDD-FDD ni miliyoni 5,85, bangana na 96,51% by’abatoye bose.

Itegeko rigenga amatora mu Burundi riteganya ko kugira ngo ishyaka rigire urihagararira mu Nteko Ishinga Amategeko, riba risabwa byibuze amajwi 2%.

Ishyaka ritavuga rumwe n’ubutegetsi ryagize amajwi menshi ni UPRONA yatowe n’abantu 80.639 bangana na 1,38%. Andi mashyaka yatowe n’abari hagati ya 0,58% na 0,01%.

Umukandida wigenga we asabwa amajwi 40% kugira ngo yinjire mu Nteko. Nta n’umwe wahiriwe n’aya matora kuko bigaragara ko abenshi bafite amajwi 0,01%.

Inteko Ishinga Amategeko y’u Burundi izaba igizwe n’abadepite 111. Abandi 11 barenga ku 100 batowe tariki ya 5 Kamena, bazaboneka hashingiwe ku ihame ry’uburinganire bw’abagore n’abagabo ndetse n’amoko.

Umuyobozi w’ishyaka UPRONA, Olivier Nkurunziza, yatangaje ko aya matora yagenze nabi kuko habayemo byinshi bitubahirije amategeko harimo iterabwoba urubyiruko rw’Imbonerakure rushamikiye kuri CNDD-FDD rwashyize ku batora ndetse n’ubujura bw’amajwi.

Nkurunziza yasabye Perezida Evariste Ndayishimiye w’u Burundi guha agaciro uburemere bw’ibyagenze nabi muri aya matora, hanyuma agafata ingamba zigamije kurengera demokarasi iri mu kaga.

Yagize ati “Kuri Perezida wa Repubulika, turamusaba gufata ingamba zihuse zo kurengera demokarasi iri mu kaga, ashingiye ku buryo amatora yagenze.”

Ishyaka UPRONA ryasabye ko mu Burundi haba ibiganiro bya politiki bigamije gushakira umuti amakimbirane ahari, hashingiwe ku masezerano y’amahoro yasinyiwe i Arusha mu 2000.