Colonel Joseph Nganzo Olikwa Tipi wo mu ngabo za Repubulika Iharanira Demokarasi ya Congo (FARDC), yiciwe mu mirwano yasakiranyije FARDC n’abayifasha urugamba n’ihuriro rya Twirwaneho na AFC/M23.

Colonel Nganzo yari asanzwe ari umuyobozi wungirije wa Brigade ya 12 y’Ingabo za RDC ikorera mu Minembwe, gusa yanabaye umuyobozi wa Brigade ya 212 ya FARDC.

Ku wa Kabiri tariki ya 3 Werurwe ni bwo yiciwe mu gace ka Mikenke muri Komine ya Minembwe, ahakomeje kubera imirwano y’ishiraniro hagati y’ihuriro zirwana ku ruhande rwa Leta ya RDC n’irya AFC/M23 na Twirwaneho.

Amakuru avuga ko uyu Colonel wari uyoboye abasirikare ba FARDC bo mu mutwe udasanzwe uzwi nka Hiboux bari kurwanira mu Minembwe, yarashwe na mudahusha nyuma yo gutegwa igico.

Uyu mugabo yishwe mu gihe yari yarafatiwe ibihano n’Umuryango w’Ubumwe bw’u Burayi, bijyanye n’ibitero abasirikare yari ayoboye bagiye bagaba ku baturage bo mu Minembwe ndetse n’ibyaha birimo gusambanya abagore ku ngufu bagiye bakora, hagati ya Kamena n’Ukuboza 2021.