Umuyobozi w’ihuriro AFC/M23 rirwanya ubutegetsi bwa Repubulika Iharanira Demokarasi ya Congo, Corneille Nangaa, yatangaje ko buri gushaka kwagurira mu karere kose intambara yo mu ntara ya Kivu y’Amajyaruguru na Kivu y’Amajyepfo.

Nyuma y’igitero cya drones ingabo za Leta ya RDC zagabye mu mujyi wa Goma ku wa 11 Werurwe 2026, Nangaa yatangaje ko kimaze iminsi gitegurwa kuko hari ubukangurambaga buyobowe n’ab’i Kinshasa busaba abatuye i Goma kuhava.

Yagize ati "Ubu bukangurambaga bwateguje igitero cya vuba cy’ihuriro ry’ingabo za Leta (FARDC, FDLR, Wazalendo, FDNB n’abacanshuro) ku mujyi wa Goma. Ubutumwa busaba abaturage kuva muri uyu mujyi bwakwirakwijwe ku mbuga z’abantu bose bo hafi ya Leta ya Tshisekedi kugira ngo umuryango mpuzamahanga wumve ko abaturage bari gushira i Goma."

Nangaa yatangaje ko Leta ya RDC ifite umugambi wo kwica abayobozi ba AFC/M23 ndetse n’abanyapolitiki batavuga rumwe na yo kugira ngo ice intege uruhande bitavuga rumwe, ariko ko inashaka "kwenyegereza intambara yagutse mu karere."

AFC/M23 yagaragaje ko mu gihe Leta ya RDC ikomeje kwenyegeza intambara, abarwanyi bayo bafite inshingano yo kurinda abaturage bashinzwe kandi ko Perezida Félix Tshisekedi azirengera ingaruka izaterwa n’intambara izakurikiraho.