Kuri uyu wa Kabiri, itariki 31 Ukuboza 2024, Cote d’Ivoire yatangaje ko Ingabo z’Abafaransa zizava muri iki gihugu, bikarangiza imyaka mirongo iki gisirikare cyari kihamaze.

Sponsored Ad

Ni kimwe mu bihugu biheruka bya Afurika bikomeje guhatira u Bufaransa kugabanya ingabo zabwo muri Afurika.

Perezida Alassane Ouattara mu ijambo risoza umwaka, yatangaje ko gucyura ingabo bizatangira muri Mutarama 2025 nk’uko inkuru dukesha Deutsche Welle ivuga.

Ouattara ati: “Twafashe icyemezo ku kuvana guhujwe kandi kwateguwe kw’Ingabo z’Abafaransa muri Cote d’Ivoire.”

Indi nzitizi ku Bufaransa

Mu myaka ibiri ishize, u Bufaransa bwahatiwe kuva mu bihugu bitari bike byo muri Afurika y’iburengerazuba, kuva muri Mali, Burkina Faso na Niger, nyuma y’ihirika ry’ubutegetsi rya gisirikare ndetse n’imyumvire yo kurwanya u Bufaransa.

Kuva ubwo ibyo bihugu bimwe byashakishije umubano wa hafi n’u Bushinwa n’u Burusiya.

Vuba aha, Senegal na Tchad nabyo byasabye Ingabo z’Abafaransa kugenda. Tchad yabaye umufatanyabikorwa w’u Bufaransa mu kurwanya abahezanguni biyitirira idini ya Islam, aho bwari busigaranye ibirindiro bya nyuma mu karere ka Sahel.

Ingabo z’u Bufaransa ubu zizaba zisigaye gusa muri Djibouti na Gabon.