Ikirombe cyahirimye mu gace gacukurwamo amabuye y’agaciro k’i Tilwizembe, kuri kilometero 25 uvuye mu mujyi wa Kolwezi, mu ntara ya Lualaba, mu majyepfo ashyira uburasirazuba bwa Repubulika ya Demokarasi ya Congo (DRC), cyishe abantu nibura 11 naho abandi batandatu barakomereka.

BBC dukesha iyi nkuru ivuga ga ko yabonye inyandiko y’ikigo SAEMAPE gishinzwe gutanga ubufasha no kugenzura ubucukuzi gakondo n’ubuciriritse bw’amabuye y’agaciro, ivuga ko iryo hirima ry’ikirombe ryabaye ahagana saa cyenda z’ijoro (3:00) ku wa gatandatu.

Iryo hirima ryazitse abacukuzi gakondo bari barimo bacukura ayo mabuye mu buryo bunyuranyije n’amategeko, nkuko icyo kigo cyabitangaje. Imirambo yakuwe muri icyo kirombe yoherezwa mu buruhukiro bwa Lualaba-Mupandja.

Ikigo SAEMAPE, gishamikiye kuri minisiteri ishinzwe ubucukuzi bw’amabuye y’agaciro, kivuga ko mu byateje iryo hirima ry’ikirombe harimo gukora imirimo nijoro mu buryo bunyuranyije n’amategeko, kudakora neza kw’ahanyuzwa imyanda, n’ubufatanyacyaha bw’abashinzwe umutekano kuri icyo kirombe.

Ibi byago bibaye nyuma y’ibindi nka byo byinshi byabaye mu mwaka wa 2024 byishe abacukuzi gakondo 17 kuri iki kirombe n’ubundi.

Abategetsi b’intara barajya inama ko ibikorwa by’ubucukuzi bw’amabuye y’agaciro biba bihagaritswe aka kanya, hagakorwa isuzuma rya tekinike ry’uduce tudatekanye, n’igenzurwa ry’uduce tw’ubucukuzi bw’amabuye y’agaciro turi mu manegeka.

Hanagiwe inama yo gukurikiza ingamba z’umutekano no gukora mu masaha yagenwe y’akazi, mu rwego rwo kwirinda ibindi byago.

Ihirima ry’ikirombe cy’i Tilwizembe rikurikiye irindi ryo ku itariki ya 28 Mutarama (1) uyu mwaka ry’ikirombe gicukurwamo coltan cy’i Rubaya, mu ntara ya Kivu ya Ruguru igenzurwa n’umutwe w’inyeshyamba wa M23, abategetsi bavuga ko ryishe abantu barenga 200.