Umukuru w’abatavugarumwe n’ubutegetsi muri Repubulika ya Demokarasi ya Congo Martin Fayuku, yakomerekeye mu myigaragambyo yabereye hafi y’inteko ishingamategeko mu murwa mukuru Kinshasa kuri uyu wa gatanu.

Martin Fayulu wabaye uwa gatatu mu matora ya perezida ya 2023, ari mu bakomerekeye mu bushyamirane na polisi yariho ibuza abo bantu kwigaragambya.

Ihuriro ry’abatavugarumwe n’ubutegetsi muri DR Congo ryarenze ku mabwiriza ya polisi yabuzaga kwigaragambya ku nteko ishingamategeko uyu munsi.

Abapolisi benshi bari boherejwe kurinda ingoro y’inteko ari na ho bavuye ubushyamirane mu gihe polisi yatatanyaga abaje kwigaragambya.

Amashusho yashyizwe ku mbuga nkoranyambaga yerekana Martin Fayulu ava amaraso ku ishati arimo gutwarwa n’abamushyigikiye, nubwo ubukana bw’igikomere yagize kugeza ubu butaramenyekana.

Mbere, abategetsi bari babujije imyigaragambyo kuri iyo nzu izwi nka Palais du Peuple, bagira inama abigaragambya yo kujya kubikorera ahitwa Kasa-Vubu muri Kinshasa.

Iyi myigaragambyo itangiye nyuma y’uko ku wa kabiri umutwe w’abadepite w’inteko ishingamateko ya RD Congo wemeje umushinga w’itegeko rya referandum, ubu utegerejwe kwemezwa na sena mbere y’uko Perezida Tshisekedi awusinya nk’itegeko.

Abatavugarumwe n’ubutegetsi baramagana ibyo bikorwa bavuga ko bigamije guhindura itegekoshinga kugira ngo Perezida Félix Tshisekedi yiyamamarize manda ya gatatu nyuma ya 2028, manda atemerewe n’itegekonshinga ririho ubu.