Umusirikare wo mu ngabo za Repubulika Iharanira Demokarasi ya Congo zirwanira mu mazi ziba mu kigo cya Banana giherereye muri teritwari ya Muanda mu ntara ya Kongo-Central, yiciye abaturage batatu mu rusengero.

Sponsored Ad

Tariki ya 11 Gicurasi 2025, uyu musirikare yinjiye mu rusengero rw’itorero rya Bethesda Ministry, abaririza uwitwa Naomie. Abakirisitu barimo bahiye ubwoba, bose baraceceka.

Muri uko gushakisha Naomie, uyu musirikare yahise arasa mu bakirisitu, babiri bahita bapfa, undi yicwa n’ibikomere ubwo yari mu bitaro bikuru bya Muanda. Abandi batatu barakomeretse.

Umuyobozi wungirije wa terirwari ya Muanda, Nicolas Kinduelo, yatangaje ko abaturage barushije imbaraga uyu musirikare, baramufata.

Hashingiwe ku ibwiriza ryatanzwe n’ubuyobozi bw’ikigo cya gisirikare cya Banana, urubanza rw’uyu musirikare rwatangiye ku wa 12 Gicurasi 2025, mu rukiko rwa Muanda.